Lıvııalyq kóterilisshiler Trıpolıdi basyp aldy
ASTANA. 22 tamyz. QazAqparat - Lıvııalyq kóterilisshiler Mýammar Kaddafıdiń rezıdentsııasy ornalasqan shaǵyn ǵana Bab ál-Azızııa sharshysynan basqa Trıpolı aýmaǵyn túgelimen baqylaýǵa aldy.
Bul týraly «Ál-Jazıra» telearnasynan kóterilisshiler ókiliniń málimdemesine silteme jasap, Reuters agenttigi habarlady.
RBK agenttigi habarlaǵandaı, halyqaralyq qylmystyq sot kóterilisshilerdiń Mýammar Kaddafıdiń balasy Saıf ál-Islamdy tutqynǵa alǵandaryn rastap otyr. Buǵan deıin eldiń astanasy Trıpolıge shabýyl jasaýshy Lıvııa oppozıtsııasynyń jaqtastary olarǵa memleket basshysynyń úlken uly Muhamedtiń berilgendigin aıtqan bolatyn. Al onyń ózi Al Jazzera telearnasyna ózin kóterilisshilerdiń úıqamaqta ustap otyrǵanyn, onyń ómiri qaýipsiz jaǵdaıda kepildendirilgenin aıtqan bolatyn.
Trıpolıdegi jaǵdaı týraly qarama-qaıshy aqparattar da joq emes. Al Jazzera telearnasynyń habarlaýynsha, Bab ál-Azızııa áskerı bazasyn da narazylyqqa qatysýshylar tolyq baqylaýǵa alǵan kórinedi. Al Sky News telearnasynyń aıtýynsha, oppozıtsııa ókilderi tek qalanyń ortalyǵyn ǵana baqylaýǵa alǵanǵa uqsaıdy.
