Lıvııadaǵy áskerı lagerde bolǵan jarylystan 7 adam qaza tapty
ASTANA. KAZINFORM — Lıvııanyń batysyndaǵy áz-Zaýııa qalasynda ornalasqan áskerı lagerde bolǵan jarylystan 7 adam qaza tapty, dep habarlaıdy Report.
Portaldyń málimetinshe, jarylys ál-Harsha aýdanyndaǵy «Radar» áskerı lagerinde jattyǵý kezinde bolǵan.
Qaza tapqandar qaýipsizdikke tónetin qaterlerge qarsy kúres qyzmetiniń basshysy Muhammed Bahrýnǵa baǵynatyn qarýly qurylymdardyń quramynda bolǵan.
Jaralanǵandardyń arasynda Bahrýnnyń baqylaýyndaǵy túrmelerge jaýapty adam da bar. Kýágerlerdiń aıtýynsha, ol aýyr jaraqat alǵan.
Trıpolıden batysqa qaraı ornalasqan áz-Zaýııa qalasynda eldegi eń iri munaı óńdeý zaýyty men munaı porty bar.
Sońǵy ýaqytta qala aýmaq pen yqpal úshin básekelesetin qarýly toptar arasyndaǵy qaqtyǵystardyń alańyna aınaldy. Sonyń saldarynan joldar jabylyp, ınfraqurylym nysandarynyń jumysy buzylǵan.
Aıta keteıik, Afınanyń týrıstik aýdanyndaǵy Zevs ǵıbadathanasynyń mańynda jarylys boldy.
