Lıvııada sý tasqynynan qaza tapqan taǵy 64 adamnyń máıiti tabyldy
Lıvııada sý tasqynynan mert bolǵan taǵy 64 adamnyń denesi tabyldy. Bul týraly Lıvııa Ulttyq birlik úkimeti málim etti. QazAqparat bul týraly Anadoly-ǵa silteme jasap habarlaıdy.
«Keıingi 48 saǵatta taǵy 64 adamnyń máıiti tabyldy. Osy kezeńde tasqynnan zardap shekken aýdandardaǵy 714 naýqasqa medıtsınalyq kómek kórsetildi», – dedi úkimettik Jedel medıtsınalyq kómek jáne qoldaý ortalyǵynyń ókili Muhammed Kablan.
10 qyrkúıekte Lıvııanyń soltústik-shyǵysyna «Danıel» ataýy berilgen qýatty tsıklony tóngenin jazǵan bolatynbyz. Ol Jerorta teńizi jaǵalaýynda ornalasqan qalalarǵa daýyl men nóser jaýyn alyp keldi. Alǵashqyda 3 myń adamnyń qazasy týraly habarlandy.
Dúnıejúzilik densaýlyq saqtaý uıymynyń deregi boıynsha, Lıvııada 4 myńnan astam adam qaıtys bolǵan. Lıvııanyń 8 500-den astam azamaty áli de iz-túzsiz joǵalyp ketkender qatarynda tur.
