Lıvııada mıgranttar mingen keme apatqa ushyrap, 18 adam qaza tapty

ASTANA. KAZINFORM — Lıvııanyń shyǵysyndaǵy Tobrýk qalasy mańynda mıgranttar mingen keme apatqa ushyrap, keminde 18 adam qaza tapty. Taǵy 50 adam iz-túzsiz joǵalǵandar qatarynda, dep habarlaıdy AZERTADJ.

Bul týraly seısenbi kúni Halyqaralyq kóshi-qon uıymy sheteldik BAQ-qa silteme jasap habarlady.

— Qazirgi ýaqytta 10 adamnyń aman qalǵany anyqtaldy, — delingen HKU málimdemesinde.

Oqys oqıǵa ótken demalys kúnderi Mysyrmen shekaralas Tobrýk qalasyna jaqyn mańda bolǵan. Qutqarý operatsııasy áli jalǵasyp jatyr.

Uıym bul qaıǵyly jaǵdaıdy «qaýipsizdik pen múmkindikterdi izdep, adamdardyń ómirine qaýip tóndiretin saparlarǵa barýyna májbúr bolyp otyrǵanyn eske salatyn aýyr tragedııa» dep atady.

Halyqaralyq kóshi-qon uıymy málimdeýinshe, Lıvııa — mıgranttar men bosqyndar úshin negizgi tranzıttik elderdiń biri bolyp otyr.

— Olardyń kóbisi qanaý men adam quqyqtarynyń buzylýyna ushyrap, ómirine qaýip tóndiretin saparlarmen betpe-bet keledi, — dep atap ótti vedomstvo.

Uıym osyndaı osal toptardy qorǵaý sharalaryn kúsheıtýge shaqyrdy.

Budan buryn 1 shildede Lıvııa jaǵalaýynda 1 mıllıon barrel munaı tasymaldaıtyn Vilamoura tankerinde jarylys boldy. QR Energetıka mınıstrligi borttaǵy munaıdyń qazaqstandyq emes ekenin málimdedi.