Lıvııada mıgranttar mingen qaıyqtar sýǵa batyp ketti

ASTANA. KAZINFORM — Lıvııa jaǵalaýynda eki qaıyqtyń apatqa ushyraýy saldarynan keminde tórt mıgrant qaza tapty, dep habarlaıdy TASS agenttigi.

Lıvııanyń Qyzyl Jarty Aı qoǵamy taratqan málimetke sáıkes, eki qaıyqta shamamen 95 adam bolǵan.

Lıvııa Afrıkanyń túrli elderinen keletin mıgranttar úshin Eýropaǵa Jerorta teńizi arqyly jetýge tyrysatyn negizgi tranzıttik núktelerdiń biri bolyp qala beredi. Jyl saıyn ondaǵan myń adam osyndaı qaýipti jolǵa shyǵyp, olardyń júzdegeni sýdaǵy apattardan kóz jumady.

Halyqaralyq kóshi-qon uıymynyń sońǵy derekterine qaraǵanda, Lıvııa aýmaǵynda 44 elden kelgen shamamen 867 myń mıgrant turyp jatyr.

Buǵan deıin Malaızııa bıligi Taıland shekarasyna jaqyn mańda mıgranttar mingen qaıyqtyń aýdarylýy saldarynan 13 adamnyń qaza tapqanyn habarlaǵan edi. Qaıyqta Mıanmadan shyqqan zańsyz mıgranttar bolǵan. Olar bastapqyda 300 adamnan turatyn úlken toppen bir kemede qozǵalyp, Malaızııaǵa jaqyndaǵanda birneshe shaǵyn qaıyqqa bólinip mingen.