Lıvııada lańkestermen qaqtyǵysta 14 sarbaz ajal qushty
ASTANA. QazAqparat - Lıvııanyń Sırt qalasyndaǵy «Irak pen Levant lańkestik tobymen» soǵysyp jatqan úkimet áskeri shyǵynǵa ushyrap, qarýly qaqtyǵysta 14 sarbaz oqqa ushty, dep jazady «Habar 24».
Jergilikti aýrýhana ókiliniń málimdeýinshe, taǵy 30 adam jaraqat alǵan. Sodyrlarǵa qarsy operatsııa birneshe aıdan beri jalǵasyp jatyr.
Úkimet qarýly kúshteri «Irak pen Levant lańkestik tobynyń» baqylaýyndaǵy aýmaqtarǵa shabýyl jasaýdy 28 tamyzda bastaǵan. Operatsııanyń qarqyndy júrgizilýine ekstremıstik uıymnyń mergenderi kedergi keltirip otyr. Qansha radıkaldyń kózi joıylǵany týraly aqparat joq.
Eske sala keteıik, Sırt qalasyn «Irak pen Levant lańkestik toby» 2015 jyly basyp alǵan bolatyn.
