Lıvııada qul bazary bar ma - Elshilik qazaqstandyq BAQ-qa jaýap berdi
ASTANA. QazAqparat -Lıvııanyń syrtqy ister mınıstrligi birqatar sheteldik BAQ-ta jarııalanǵan adam saýdasy týraly aqparatty teriske shyǵardy, dep habarlaıdy QazAqparat tilshisi.
Bul týraly Lıvııanyń Qazaqstandaǵy Tótenshe jáne Ókiletti Elshisi Salem A.A. Saıtı Astanada ótken baspasóz máslıhatynda málim etti.
«Biz sizderdi Lıvııa Syrtqy ister mınıstrliginiń birqatar BAQ-ta jarııalanǵan Lıvııadaǵy adam saýdasy týraly jalǵan aqparatqa qatysty resmı málimdemesin habarlaý úshin shaqyryp otyrmyz», - dedi Salem A.A. Saıtı.
Elshiniń aıtýynsha, Kaddafı bıligi qulaǵan soń Lıvııada barlyq quqyq qorǵaý organdary men ásker júıesi qıraǵan. Sońǵy alty jyl boıy Lıvııa óz aýmaǵy men shekaralaryn tolyq baqylaýda ustaı almaı otyr.
«Mıgranttar Lıvııanyń ońtústigi- Sahara shóli jaǵynan ótip, Eýropaǵa jetý úshin qylmystyq toptardyń kómegine júginýde. Al soltústiktegi shekarada 2 myń shaqyrymǵa sozylatyn teńiz jaǵalaýy bar. Sondyqtan, ońtústik jáne soltústik shekarany tolyq baqylaýda ustaý qıyn. Osyǵan baılanysty Lıvııa Eýropa odaǵy, BUU jáne Afrıka memleketteriniń odaǵynan memlekettik shekarany baqylaýǵa qajetti tehnıkalyq qural-jabdyqtarmen qamtamasyz etý jóninde kómek surady», - dep atap ótti dıplomat.
Sondaı-aq, elshi quqyq qorǵaý organdarynyń tergeý jumystaryn júrgizgenin, qylmystyq toptardyń zańsyz mıgranttardy kúshtep jumysqa jekkeni týraly aqparattyń rastalmaǵanyn jetkizdi. Munda adam saýdasy emes, Lıvııa aýmaǵy arqyly Afrıka mıgranttarynyń zańsyz tranzıti týraly ǵana áńgime bolýy tıis.
Sondaı-aq, elshi eldegi saıası jaǵdaı týraly azdy-kem aqparat berdi. Onda zańdy bılik pen túrli toptar arasyndaǵy soǵys jalǵasyp keledi. Elshi jaqyn arada BUU-da Lıvııanyń birigýi týraly kelisimge qol qoıylatynyn habarlady jáne 2018 jyly álemniń birtutas Lıvııany kóretinine úmit bildirdi.
Eske sala ketsek, buǵan deıin amerıkalyq CNN arnasy Lıvııa bazarynda Eýropaǵa ótýge áreket jasaǵan zańsyz kelimsekterdiń qul retinde satylyp jatqany týraly beınejazba jarııalady. Beımaterıalǵa sáıkes, zańsyz mıgranttyń bireýi shamamen 400 dollarǵa aýyl sharýashylyqtarynda jumys istetý maqsatynda satylǵan.
BUU Bas hatshysy Antonıý Gýterrısh zańsyz mıgranttardy qul retinde satyp jatqan aýktsıonnyń vıdeosyna súıenip, mıgranttardy satý jónindegi habarlamaǵa baılanysty narazylyǵyn bildirdi.
«Bizdiń álemde quldyqqa oryn joq. Adam quqyǵyn buzatyn mundaı jan tózgisiz áreketter adamgershilikke qarsy qylmys retinde baǵalanýy múmkin», - dedi BUU Bas hatshysy uıymnyń Nıý-Iorktegi shtab-páterinde jýrnalısterge bergen suhbatynda.
CNN arnasynyń efırinde kórsetilgen qul saýdasy týraly fılm kórsetilgen soń, Parıj turǵyndary adam saýdasyna qarsy sherý ótkizip, tártip saqshylarymen qaqtyǵysqa tústi.
