Lıvııada bolǵan sý tasqyny qurbandarynyń sany 11 myńǵa jetti
Epıtsentri Derna qalasynda bolǵan tasqyn saldarynan 11 myń adam qaza taýyp, 20 myń turǵyn iz-túzsiz joǵalyp ketken. Bul týraly RBK Al-Hadath-qa silteme jasap málim etti, dep habarlaıdy QazAqparat.
Lıvııadaǵy Halyqaralyq Qyzyl Krest komıteti azamattar men qutqarýshylardy abaı bolýǵa shaqyrdy.
«Derna – soǵystan qalǵan jarylýy múmkin qaldyqtarmen lastanǵan qala ekeni belgili», delingen habarlamada.
Sý tasqyny saldarynan oq-dári men mına qaldyqtary burynǵy ornynan qalaǵa shashylǵan bolýy múmkin, dep eskertti uıym.
10 qyrkúıekte Lıvııanyń shyǵysyna «Danıel» daýyly tóndi. Ol jaǵalaýdaǵy Bengazı, Derna jáne Djabal ál-Ahdar qalalaryna zaqym keltirdi. Lıvııa bıligi Kırenaıka shyǵys provıntsııasyndaǵy úsh aýdandy apat aımaǵy dep jarııalady.
Daýyl saldarynan Dernany qorshap turǵan eki plotına jarylyp, sý tasydy. Sý adam turatyn kvartaldardy shaıyp, Lıvııanyń shyǵys bóligindegi jaǵalaý mańyndaǵy úılerdi qıratty. Bılik ókilderi tótenshe jaǵdaı jarııalady. Mektep pen dúkender jabylyp, komendanttyq saǵat engizildi. BUU uıymy jergilikti jáne ulttyq deńgeıde jedel kómek kórsetýge ýáde berdi.
