Lıvııa jaǵalaýynda keme aýdarylyp, jeti adam qaza tapty
ASTANA. QazAqparat - Lıvııa jaǵalaýynda mıgranttar mingen kemeniń aýdarylýy saldarynan eń kemi jeti adam ajal qushty, dep habarlady Bı-bı-sı.
Shamamen 500 adam qutqaryldy. Qutqarý sharasy jalǵasyp jatyr, qaza tapqandardyń sany ulǵaıýy múmkin.
Batyp bara jatqan kemeni birinshi bolyp ıtalıandyq patrýldik "Bettıka" kateri baıqap qalǵan.
BUU bosqyndar isi boıynsha Joǵarǵy komıssar basqarmasynyń aqparatynsha, aǵymdaǵy jyldyń basynan Jerorta teńizinde shamamen 40 myń mıgrant qutqaryldy. Osy aptanyń basynan 5 600-ǵa jýyq adam qutqaryldy.
Osyǵan deıin BUU habarlaǵandaı, aǵymdaǵy jyly shamamen 180 myń adam teńiz arqyly Eýropaǵa jetpek bolǵan. Solardyń shamamen 800-i jolda ajal qushty.
