Lıvııa jaǵalaýlarynda 200-den astam bosqyn qurban boldy
BRıÝSSELЬ. QazAqparat - Qaıyqtyń aýdarylyp qalýy saldarynan Jerorta teńizinde 200-den astam bosqyn qurban boldy, dep habarlaıdy «QazAqparat» HAA-niń menshikti tilshisi Ispanııanyń Proactiva Open Arms uıymyna silteme jasap.
Beısenbi kúni Lıvııa jaǵalaýlarynda Proactiva Open Arms uıymynyń eriktileri sýǵa batyp ketken eki qaıyqtyń bólikterin tapqan. Olardyń árqaısysyna 100-den astam adam syıdyrýǵa bolatyndyǵy habarlanady.
«Biz 5 adamnyń denesin bortqa kóterdik. Biz Eýropa buryn-sońdy kórmegen jan túrshigerlik oqıǵanyń kýási boldyq»,-dep jazdy Proactiva Open Arms uıymynyń ókilderi Facebook paraqshasynda.
Aıta keteıik, Halyqaralyq kóshi-qon uıymynyń málimetteri boıynsha, Eýropaǵa 2016 jyly Jerorta teńizi arqyly 363 myńnan astam mıgranttar men bosqyndar keldi. Ol kezde 5 myńnan astam adam jol boıynda mert boldy.
