Lıvııa jaǵalaýyndaǵy tanker jarylysy: keme qazaqstandyq munaıdy tasymaldamaǵan

ASTANA.KAZINFORM - Lıvııa jaǵalaýynda 1 mıllıon barrel munaı tasymaldaıtyn Vilamoura tankerinde jarylys boldy. QR Energetıka mınıstrligi borttaǵy munaıdyń qazaqstandyq emes ekenin málimdedi, dep habarlaıdy Kazinform.

Buǵan deıin BAQ-ta tankerde qazaqstandyq munaı bolýy múmkin degen aqparat taraǵan bolatyn.

Bloomberg jınaǵan kemelerdi qadaǵalaý derekterine sáıkes, Vılamýra sáýir aıynyń basynda Reseıdiń Ýst-Lýga portyna kelip, onda qazaqstandyq munaıdy tıegen. Mamyr aıynda tanker Reseıdiń Novorossıısk portynyń janyndaǵy Kaspıı qubyr konsortsıýmynyń termınalyna da keldi, ol negizinen qazaqstandyq munaıdy jóneltedi.

Oqıǵaǵa qatysty QR Energetıka mınıstrligi túsinik berdi.

- Oqıǵa Lıvııa porttarynyń birinde sońǵy tıeý júrgizilgen jeke tankermen bolǵan, oqıǵa kezinde bortta qazaqstandyq munaı bolǵany týraly aqparat shyndyqqa janaspaıdy, -delingen vedomstvo málimdemesinde.

Aıta keteıik, qazir tankerdi súırep Grekııaǵa jetkizýge tyrysyp jatyr, kelgennen keıin keltirilgen shyǵyndy baǵalaý júrgiziledi.

TMS Tankers operator kompanııasy ókiliniń aıtýynsha, jarylys saldarynan kemeniń mashına zalyn sý basqan. Jarylystyń naqty sebebi áli anyqtalǵan joq. Jarylys saldarynan qorshaǵan ortanyń lastanýy tirkelgen joq, búkil ekıpaj qaýipsiz.