Lıvııa men Qytaı ıýanmen tikeleı esep aıyrysýǵa kelisti
ASTANA. KAZINFORM — Lıvııa men Qytaıdyń ortalyq bankteri lıvııalyq kommertsııalyq bankterdi Qytaıdyń transshekaralyq tólem júıesi – CIPS júıesine qosý týraly kelisimge keldi. Bul qadam eki el arasyndaǵy halyqaralyq qarjylyq operatsııalardy ıýanmen tikeleı júrgizýge múmkindik berip, AQSh dollaryna táýeldilikti azaıtýdy kózdeıdi, dep habarlady Euronews.
Kelisim Lıvııa Ortalyq bankiniń tóraǵasy Najı Muhammad Isanyń Beıjińge jasaǵan sapary kezinde jasaldy. Ol Qytaı Halyq bankiniń tóraǵasy Pan Gýnshenmen kezdesip, eki el arasyndaǵy saýda-ekonomıkalyq yntymaqtastyqty damytý máselelerin talqylady.
CIPS júıesine qosylý lıvııalyq bankterge qytaı valıýtasymen tólemderdi tikeleı jiberýge jáne qabyldaýǵa múmkindik beredi. Bul halyqaralyq aqsha aýdarymdaryn jedeldetip, deldaldardyń sanyn qysqartady ári qytaılyq seriktestermen esep aıyrysýdy jeńildetedi.
CIPS tólem júıesin Qytaı Halyq banki 2015 jyly ıýanmen júrgiziletin transshekaralyq operatsııalarǵa qyzmet kórsetý úshin iske qosqan. Júıe qarjy uıymdaryna dástúrli dollarlyq arnalardy paıdalanbaı-aq halyqaralyq tólemderdi júzege asyrýǵa múmkindik beredi jáne álemdik saýdada ıýannyń qoldanylý aıasyn keńeıtýge yqpal etedi.
Taraptar sondaı-aq saýdadaǵy kedergilerdi birlesip joıýǵa, qarjylyq rásimderdi jetildirýge jáne eki eldiń bank júıeleri arasyndaǵy yntymaqtastyqty keńeıtýge kelisti.
Kelesi kezeńde Qytaıǵa tikeleı aqsha aýdarymdaryn iske qosý jáne qytaılyq bankter arqyly akkredıtıvter ashý múmkindigi engiziledi. Taraptardyń baǵalaýynsha, bul kompanııalardyń, ımporttaýshylardyń jáne shaǵyn bıznes ókilderiniń jumysyn jeńildetedi.
Eske salaıyq, buǵan deıin Qytaıda taǵy 12 bank tsıfrlyq ıýan júıesine qosylǵanyn habarlaǵanbyz.
