Lıvııa máselesine qatysýshy elder kelisimge keldi
BRıÝSSELЬ. QazAqparat – Berlınde Lıvııa máselesi boıynsha halyqaralyq konferentsııaǵa qatysýshylar BUU-nyń qarý-jaraq embargosyn qoldaýǵa ýaǵdalasyp jáne Soltústik Afrıkada ornalasqan osy elde qarýly toptardy qoldaýdy toqtatýǵa shaqyrdy, dep habarlaıdy QazAqparat tilshisi.
Berlındegi jıynǵa BUU Bas hatshysy Antonıý Gýterrısh, Germanııa kantsleri Angela Merkel, Reseı prezıdenti Vladımır Pýtın, Túrkııa men Frantsııanyń memleket basshylary Redjep Taıyp Erdoǵan men Emmanýel Makron, sonymen qatar Ulybrıtanııa premer-mınıstri Borıs Djonson qatysty.
Qatysýshylar tórt saǵatqa sozylǵan keńes sońynda qarý jetkizýdi toqtatyp, bılikke talasyp jatqan eki tarapty tatýlastyrý sharalaryn qolǵa alýǵa kelisti.
Qujatqa 12 eldiń ókilderi, sonymen qatar Birikken Ulttar Uıymy, Eýropalyq Odaq, Afrıkalyq Odaq jáne Arab memleketteri lıgasy ókilderi qol qoıdy.
«Bárimiz qarý jetkizý embargo talaptaryna jaýapkershilikpen qarap, ony byltyrǵydan da qatty baqylaýǵa alýymyz kerek», - dedi Germanııa kantsleri Angela Merkel.
Aıta ketsek, Lıvııada 2011 jyldan beri azamattyq soǵys júrip jatyr. Lıvııa Ulttyq áskeri eldiń shyǵysyndaǵy úlken aýmaqty baqylaýda ustaıdy. Ótken jyldyń sáýir aıynda olar Trıpolıdegi Ulttyq kelisim úkimetin qoldaıtyn kúshke qarsy is-qımyldy bastady.