Lıvııa Kaddafıdiń ulyn Gaagaǵa berýden bas tartty
ASTANA. 21 qarasha. QazAqparat - Lıvııanyń jańa úkimeti Mýammar Kaddafıdiń uly Seıf ál-Islamdy Gaagadaǵy halyqaralyq qylmystyq sotqa berýden bas tartty. Bul týraly eldiń aqparat mınıstri Mahmud Shammamǵa silteme jasap, Associated Press agenttigi habarlady.
Sky News-tiń óz derekkózi boıynsha, jeksenbi kúni Lıvııa úkimetinde jaqynda eldiń ońtústiginde ustalǵan Seıf ál-Islam Kaddafıdiń odan arǵy taǵdyryna qatysty daýys berý sharasy ótti. Onyń qorytyndysy boıynsha óltirilgen dıktatordyń ulyn óz otanynda sottaýǵa sheshim qabyldandy.
Bul sheshim Seıf ál-Islamnyń «lıvııa halqyna qarsy qylmystaryna» oraı qabyldandy. Halyqaralyq qylmystyq sot budan buryn Kaddafıdyń ulyn adamzatqa qarsy qylmystary úshin tutqynǵa alýǵa order bergen bolatyn. Halyqaralyq sot Mýammar Kaddafıdyń ózin tutqyndaýǵa da order bergen bolatyn.
Seıf ál-Islam 19 qarasha kúni Nıgerge qashpaq bolǵan jerde qolǵa tústi. Ol qazir Zıntan qalasynda. Taıaýdaǵy ýaqytta ol Trıpolıge iljóneltilmekshi, alaıda zıntandyq kóterilisshiler Kaddafıdiń ulyn Lıvııada jańa sot júıesi qurylǵansha ózderinde ustamaq.
Seıf ál-Islamnyń ustalǵany týraly habar belgili bolǵannan keıin Eýropalyq odaq lıvııalyq bılikten ony ádiletti sottaýdy talap etti. Lıvııa premer-mınıstri Ábdel Rahım ál-Kıb bul ótinishti oryndaýǵa ýáde berdi. Budan buryn kóterilisshiler óltirgen Mýammar Kaddafıdiń uly Gaagadaǵy trıbýnalǵa beriletinine úmitti bolǵan edi.
