Lıvııa áskerıleri joǵalǵan 2,5 tonna ýrandy tapty

TRIPOLI. QazAqparat – Lıvııa aýmaǵynyń bir bóligin baqylaıtyn áskerıler budan buryn BUU janyndaǵy Atom energııasy jónindegi halyqaralyq agenttik ókilderi joǵalyp ketti dep jarııalaǵan 2,5 tonna ýrannyń tabylǵanyn málimdedi, dep habarlaıdy QazAqparat VVS-ge silteme jasap.

Jaqynda MAGATE ınspektorlary Lıvııadaǵy aty atalmaǵan, jetý joly qıyn qoımaǵa baryp, el bıligi maǵlumdaǵan 10 barrel baıytylmaǵan ýrannyń joqtyǵyn anyqtady.

Alaıda, Lıvııanyń shyǵys aımaqtaryn baqylaıtyn Ulttyq armııanyń (LNA) resmı ókilderi bóshkeler Chadpen shekara mańynda, Lıvııanyń ońtústiginde ornalasqan saqtaý qoımasynan bes shaqyrym jerde tabylǵanyn aıtady. MAGATE bul málimdemeni tekserýge tyrysyp jatqanyn habarlady.

Lıvııanyń batys aımaqtaryn BUU moıyndaǵan Ulttyq kelisim úkimeti (UUK) baqylaıdy, al shyǵysy general Halıfa Haftardyń Lıvııa ulttyq armııasynyń (LNA) baqylaýynda. Eldi baqylaýǵa birneshe basqa top pen shet memleketter de talasqa túsip otyr.

Seısenbi, 14 naýryzda MAGATE ınspektorlary aımaqtaǵy túrli qarýly toptardyń kúresine baılanysty sońǵy ýaqytta kirý qıynǵa soǵatyn synaq alańyn tekserýge barǵan. MAGATE basshysy Rafael Grossı ınspektorlar ýran bóshkelerin olar bolýy tıis jerden tappaǵanyn aıtty.

«Agenttik radıoaktıvti materıaldyń qandaı jaǵdaıda shyǵarylǵanyn jáne onyń qazir qaıda ekenin anyqtaý úshin qosymsha zertteýler júrgizedi. Radıoaktıvti materıaldyń qazirgi orny týraly aqparattyń bolmaýy radıologııalyq qaýip, sonymen qatar ıadrolyq qaýipsizdikke qatysty alańdaýshylyq týdyrýy múmkin», - dedi Grossı MAGATE Basqarýshylar keńesine múshe elderge.

Jetispeıtin ýran bóshkeleri saqtalǵan polıgon BUU moıyndaǵan bılik organdary baqylaıtyn aýmaqtan tys jerde ornalasqan. MAGATE kommertsııalyq spýtnıktik sýretterdi jáne basqa da jalpyǵa qoljetimdi derekterdi paıdalana otyryp, osy aýmaqty únemi baqylaýda ustaıdy.