«Lıverpýldiń» bas bapkeri Arne Slot qyzmetinen ketedi
ASTANA. KAZINFORM — Aǵylshyndyq «Lıverpýl» fýtbol klýbynyń bas bapkeri Arne Slot komandadan ketetin boldy. Bul týraly klýb resmı túrde habarlady, dep jazady euronews.
Nıderlandtyq maman ótken jyly «Lıverpýldi» Anglııa chempıony atandyryp, klýb tarıhyndaǵy 20-shy chempıondyq tıtýldy jeńip alǵan edi. Alaıda bıylǵy maýsym komanda úshin sátsiz ótti. Maýsym sońynda ǵana klýb Premer-lıgada besinshi orynǵa turaqtady.
Shvetsııalyq shabýylshy Aleksandr Isaktyń rekordtyq transferi sekildi iri satyp alýlarǵa qaramastan, komanda chempıondyq deńgeıdegi oıyn kórsete almady. Buǵan Isaktyń jaraqaty, quramnyń jańarýy jáne kóshbasshy shabýylshy Mohamed Salahtyń oıyn deńgeıiniń tómendeýi áser etken.
Klýb basshylyǵy Arne Slottyń qyzmetten ketýi ońaı sheshim bolmaǵanyn atap ótti.
— Arneniń «Lıverpýlge» qosqan úlesi zor boldy. Ol klýbqa aıtarlyqtaı tabys ákeldi. Degenmen komandanyń alǵa jyljýy úshin ózgeris qajet degen qorytyndyǵa keldik, — delingen klýb málimdemesinde.
Arne Slot «Lıverpýldi» 2024 jyly tizgindep, kóp jyl boıy komandany basqarǵan ıÝrgen Kloptyń ornyn basqan bolatyn.
Sondaı-aq klýbtyń tarıhyndaǵy úzdik surmergenderdiń biri sanalatyn Mohamed Salah ta osy jazda komandadan ketedi. Buǵan deıin ol Arne Slottyń jumys stılin synǵa alyp, «Lıverpýl» qarsylastary qorqatyn shabýyldaǵy qarqyndy oıynyna qaıta oralýy kerek ekenin aıtqan edi.
Osydan buryn Chempıondar lıgasynda «Lıverpýl» syrt alańda «Galatasaraıǵa» ese jibergeni belgili boldy.
