Lıverpýldegi jetistikke toqmeıilsýge bolmaıdy – QBF prezıdenti
ASTANA. KAZINFORM – Lıverpýldegi jetistikke toqmeıilsýge bolmaıdy. Bul týraly «Jibek Joly» telearnasynyń «Ýáde» baǵdarlamasyna suhbat bergen Qazaqstan boks federatsııasynyń prezıdenti Shahmurat Mútálip aıtty.
- Ózderińizge belgili, jaqynda elimizdiń Prezıdenti Qasym-Jomart Toqaev Aqordada Lıverpýlde top jarǵan sportshylarymyzdy qabyldap, jyly lebizin bildirdi. Memleket basshysy: «Elimizde bokstyń áleýeti zor. Ony álemdik sport qaýymdastyǵy da moıyndaıdy. Daryndy sportshylar óte kóp. Olardyń ishinde álem chempıondary da az emes. Osy baǵytta júıeli jumys jalǵastyrýymyz qajet. Boksty ulttyq sport deńgeıine kóterýimiz kerek», - degen edi. Bul – biz úshin mańyzdy qadam, óte zor jaýapkershilik, - dedi ol.
Onyń aıtýynsha, federatsııa 2024 jyldan bastap halyqaralyq deńgeıdegi aýqymdy jumystardy qolǵa aldy. Aldymen Qazaqstan boks federatsııasy álemdik World Boxing uıymynyń quramyna múshelikke ótti. Elimizdiń bilikti mamandary osy uıym komıssııasyna múshelikke qabyldandy.
- Sportshylardyń daıyndyq deńgeıi, tájirıbe almasýy boıynsha birqatar jumys isteldi. Sheteldik mamandar tartyldy. Atap aıtqanda, fızıkalyq daıyndyq boıynsha ańyz boksshymyz Gennadıı Golovkınniń jattyqtyrýshylary aǵaıyndy Kamocholar, dıetolog-formakolog maman Aleksandr Foka, Katmen Denıs, taktıkalyq daıyndyqty jaqsartý maqsatynda Kýbodan eki bapker shaqyryldy. Sol jumystardyń nátıjesi retinde Lıverpýldegi álem chempıonatyn aıtsaq bolady. Tarıhı jetistik boldy. 7 altyn, 1 kúmis, 2 qolamen álemde kósh bastadyq. Árıne, bul nátıjemen toqmeıilsýge bolmaıdy. Basty maqsatymyz – Olımpıada. Biraq, sol jumystyń bastamasy dep bilemin. Sonymen qatar jattyqtyrýshylar, ulttyq quramaǵa rezerv daıyndaý baǵytynda birqatar jumys istep jatyrmyz. Medıtsına jaǵynan dárigerler tartyldy. Júıeli jumys bastalyp, búginde kishigirim nátıjesin kórýdemiz, - dedi Shahmurat Mútálip.
Aıta keteıik, Anglııadaǵy dúbirli dodada Qazaqstan quramasy 7 altyn, 1 kúmis jáne 2 qola medal jeńip alyp, jalpykomandalyq esepte birinshi orynǵa ıe bolǵan edi.
Prezıdent bokstan Álem chempıonatynda top jarǵan boksshylardy quttyqtady.