LIVE: Konstıtýtsııalyq reforma jónindegi komıssııanyń X otyrysy
ASTANA. KAZINFORM — Konstıtýtsııalyq reforma jónindegi komıssııanyń H otyrysy ótip jatyr. Tikeleı efır saǵat 16:00–de bastaldy.
Kazinform agenttiginiń qazaq jáne orys tilindegi Telegram arnasynda mátin translıatsııasy bolady.
Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.
Aıta ketý kerek, bul ózgeristerdiń bári Konstıtýtsııalyq reforma aıasynda iske asady dep josparlanǵan. Qazirgi Májilis pen Senattyń ornyna jasaqtalatyn bir palataly Quryltaı zań jobalaryn úsh oqylymda qaraıtyny da Ata zańda norma bolyp enbek. Jańa Parlamentti jasaqtaýda «prezıdenttik kvota» degen bolmaıdy.
Alǵashqy otyrysta Ádilet mınıstri Erlan Sársembaev Konstıtýtsııaǵa Alataý qalasy sııaqty el damýyna aıryqsha orny aıqyndalǵan jekelegen aýmaqtarǵa arnaıy mártebe berý múmkindigin engizýdi usyndy.
Al «Qazaq gazetteri» jaýapkershiligi shekteýli seriktestiginiń bas dırektory, Konstıtýtsııalyq komıssııa múshesi Dıqan Qamzabekuly bilim júıesin dinı fanatızmnen qorǵaıtyn norma engizýdi usyndy.
Sonymen qatar Qazaqstan zańgerleri odaǵynyń tóraǵasy Serik Aqylbaı Ata zańǵa dinniń memleketten bólektigin tikeleı normamen aıqyndaı túsý qajettigin aıtty.
Respýblıkalyq advokattar alqasynyń tóraǵasy Mádı Myrzaǵaraev Qazaqstan aýmaǵynda sot sanktsııasynsyz ustaý merzimin 72 saǵattan 48 saǵatqa deıin qysqartý týraly usynys jasady.
Al 26 qańtar kúni II otyrys boldy. Onda Quryltaı depýtattary mınıstrlerdi laýazymynan bosatatyn norma engizý usynyldy.
Sondaı-aq Ádilet mınıstri Erlan Sársembaev Konstıtýtsııada Prezıdentke Quryltaıdyń kelisimimen, onyń depýtattarynyń jalpy sanynan kópshiliktiń daýysymen Qazaqstan Respýblıkasynyń vıtse-prezıdentin, Qazaqstan Respýblıkasynyń Premer-mınıstrin, Konstıtýtsııalyq sottyń 10 sýdıasyn, Ortalyq saılaý komıssııasynyń 6 múshesin, Joǵary aýdıtorlyq palatanyń 8 múshesin taǵaıyndaý quqyqy beriletinin aıtty.
Quryltaı depýtaty qandaı jaǵdaıda mandatynan aıyrylatyny da belgili boldy. Odan bólek vıtse-prezıdentke qandaı qyzmet júkteletini de aıqyndaldy.
Sol kúni tústen keıin Konstıtýtsııalyq komıssııanyń III otyrysy da ótti. Onda Quryltaı depýtattarynyń ókilettikteri 1,5 esege artatyny aıtyldy. Sondaı-aq Únzıla Shapaq Konstıtýtsııanyń preambýlasyna qandaı ózgerister enetinin aıtty.
Tórtinshi otyrysta Ata zańnyń Úkimet týraly bólimi de ózgeriske ushyraıtyny aıtyldy. Sonymen qatar osy basqosýda Halyq keńesi referendým ótkizýge bastama kótere alatyny belgili boldy.
Konstıtýtsııalyq komıssııa otyrysynyń moderatory, QR Konstıtýtsııalyq Sotynyń tóraıymy Elvıra Ázimova túzetýler engen Konstıtýtsııanyń alǵashqy jobasy ázirlengenin habarlady. Konstıtýtsııa jobasynda «Prezıdent» bólimi tujyrymdamalyq turǵydan qaıta qaraldy
Aıta keteıik, Konstıtýtsııalyq komıssııanyń IV otyrysy 28 qańtarda ótti. Onda birqatar usynystar, sonyń ishinde Jańartylatyn Konstıtýtsııanyń memlekettik tildegi mátinin kimder daıyndaıtyny aıtyldy.
Sondaı-aq keshe V otyrys ótti, onda da birqatar usynystar aıtyldy. Erlan Qarın Konstıtýtsııada elimizdiń basqarý nysany naqtylanatynyn aıtty. Odan bólek Konstıtýtsııanyń jańa mátinine dinge qatysty qandaı tolyqtyrýlar bolǵanyn atap ótti.
Jalpy Konstıtýtsııalyq komıssııa otyrysynda partııalar qandaı usynys aıtqanyn myna silteme arqyly oqýǵa bolady.
Sonymen qatar 30 qańtar kúni VI otyrys ótti. Onda Erlan Qarın jańa Konstıtýtsııadaǵy Qazaqstan Respýblıkasy qyzmetiniń negizgi qaǵıdattaryn ataǵan edi. Sondaı-aq jańa Konstıtýtsııanyń sońǵy nusqasynda 95 bap bolatyny aıtyldy.
Eske salsaq 3 aqpan kúni Konstıtýtsııalyq komıssııanyń VII otyrysy ótti.
Otyrysta Memlekettik keńesshi qazirgi Konstıtýtsııa men jańa Konstıtýtsııanyń aıyrmashylyqtaryn ataǵan edi. Erlan Qarın jańa Konstıtýtsııa jobasyndaǵy egemendik pen táýelsizdik uǵymdarynyń ornyna toqtalǵan edi.
Aıta ketsek 5 aqpan kúni Konstıtýtsııalyq reforma jónindegi komıssııanyń VIII otyrysy ótken edi.
Sonymen qatar Komıssııa jańa Konstıtýtsııa týraly usynystardyń qalaı eskerilgeni týraly esep beretini týraly jazǵan edik.
Al Konstıtýtsııalyq reforma jónindegi komıssııanyń IX otyrysy 7 aqpan kúni ótti. Onda Memlekettik keńesshi Erlan Qarın nelikten jańa Konstıtýtsııa qabyldaý qajet ekenin túsindirdi.