LIVE: Astanada Jeńistiń 80 jyldyǵyna arnalǵan áskerı parad ótip jatyr

ASTANA. KAZINFORM – Astanadaǵy Táýelsizdik alańynda Jeńistiń 80 jyldyǵyna arnalǵan áskerı parad ótip jatyr. Saltanatty sherýdi Jibek Joly telearnasynyń tikeleı efırinen kórýge bolady.

Jeńistiń 80 jyldyǵyna arnalǵan saltanatty is-sharaǵa 4 000-nan astam áskerı qyzmetshi, 200-den astam áskerı tehnıka, sondaı-aq maıdandyq, armııalyq jáne áskerı-kóliktik avıatsııanyń 66 ushaǵy men tikushaǵy qatysady.

Elordada ótetin aýqymdy áskerı parad qarsańynda Kazinform agenttiginiń tilshisi elimizdiń Qurlyq áskerleriniń bas qolbasshysy general-maıor Mereke Kóshekbaevpen tildesken edi. Ol Jeńistiń 80 jyldyǵyna arnalǵan áskerı paradqa basshylyq jasamaq. General daıyndyq barysynyń egjeı-tegjeıimen bólisip, bıylǵy elimizdiń basty áskerı oqıǵasy nesimen tań qaldyratynyn aıtyp berdi.