Lıvannyń soltústigindegi aýylǵa jasalǵan soqqydan 20-dan astam adam qaza tapty

ASTANA. KAZINFORM – Lıvannyń soltústiginde Izraıl áýe kúshteriniń shabýylynan keminde 21 adam qaza tapty, dep habarlady bılik. Bul týraly VVS jazdy.

Lıvan densaýlyq saqtaý mınıstrliginiń málimetinshe, shabýyl negizinen hrıstıandar turatyn Aıtý kentine jasalǵan.

Bul jer Izraıl áskeri ádette shabýyl jasaıtyn Beırýt pen basqa aımaqtardan birshama alys.

Oqıǵa ornynan alynǵan aqparatqa sáıkes, soqqy saldarynan turǵyn úı tolyǵymen qırady. Jergilikti turǵyndardyń aıtýynsha, onda Lıvannyń ońtústiginen soltústikke jaqynda kóship kelgen otbasylar turǵan.

Izraıl soqqyǵa qatysty áli túsinikteme bergen joq, biraq dúısenbi kúni premer-mınıstr Bınıamın Netanıahý «búkil Lıvandaǵy «Hezbollaǵa» soqqy jasaýdy jalǵastyrýǵa» ýáde berdi.

Ol bul málimdemesin jeksenbide «Hezbollanyń» ushqyshsyz basqarylatyn ushaǵynyǵyń shabýylynan ızraıldik tórt sarbaz qaza taýyp, ondaǵan adam jaraqat alǵan Izraıldiń soltústigindegi áskerı bazaǵa sapary kezinde jasady.

Bul lıvandyq toptyń sońǵy jylda Izraılge jasaǵan eń iri shabýyly boldy.

Sodyrlar shabýyldyń Lıvanda 1700-ge jýyq adamnyń ómirin qıǵan soqqylarǵa jaýap retinde jasalǵanyn málimdedi.

Osyǵan deıin Izraıl armııasynyń Lıvannyń ońtústiginde 800 metrlik «Hezbolla» býnkerin tapqanyn jazdyq.