Lıvannyń ońtústiginde Izraıldiń áýe shabýylynan tórt adam qaza tapty
ASTANA.KAZINFORM - Atysty toqtatý týraly kelisimge qaramastan, Lıvannyń ońtústigindegi Izraıldiń áýe shabýyldary jalǵasyp jatyr, dep habarlaıdy Kazinform agenttiginiń Taıaý Shyǵystaǵy tilshisi.
Dúısenbide Lıvannyń ońtústigindegi Nabatııa qalasynyń mańynda kólikke jasalǵan Izraıl dronynyń shabýylynan tórt adam qaza tapty.
Bul týraly Lıvannyń Densaýlyq saqtaý mınıstrligi habarlady. Mınıstrliktiń málimetinshe, qaza tapqandardyń arasynda mektep dırektory Esperansa Gandýr, onyń anasy, úı qyzmetkeri jáne sheteldik jumysshy bar.
Lıvannyń NNA aqparat agenttiginiń habarlaýynsha, Gandýr shabýyl kezinde qıraǵan Nabatııadaǵy úıiniń qalpyna keltirý jumystaryn tekserý úshin baryp qaıtyp kele jatqan.
Izraıl qorǵanys kúshteri (TsAHAL) oqıǵaǵa túsinik bere otyryp, Lıvannyń ońtústigindegi qaýipsizdik aımaǵyna jaqyndap kele jatqan jáne Izraıl áskerlerine qaýip tóndirgen kólikke soqqy bergenin málimdedi.
Nabatııadaǵy «Nadjde» aýrýhanasy qyzmetkerleriniń aıtýynsha, jarylys jergilikti turǵyndar úshin atysty toqtatý kúshine engennen beri salystyrmaly túrde qaýipsiz dep sanalatyn aımaqta bolǵan. Alaıda olar Izraıl tarapynan dron shabýyldary atysty toqtatýǵa deıingi kezeńge qaraǵanda aıtarlyqtaı sırek bolsa da, jalǵasyp jatqanyn atap ótti.
Izraıl shekara boıynda qurǵan shamamen 10 shaqyrymdyq «qaýipsizdik aımaǵynda» áskerin ustap, eldiń soltústik aımaqtaryn «Hezbolla» shabýyldarynan qorǵaý qajet ekenin alǵa tartty.
Lıvan bıligi Izraıl áskerleriniń óz aýmaǵynda bolýyn memlekettik egemendikti buzý dep sanaıdy. AQSh pen Katardyń deldaldyǵymen, Irannyń qatysýymen júrgizilgen kelissózderden keıin Izraıl men Lıvan arasyndaǵy atysty toqtatý maýsym aıynyń sońynda kúshine endi.
Áskerı qaqtyǵys qarqynynyń tómendeýine qaramastan, eki tarap bir-birin atysty toqtatýdy buzdy dep únemi aıyptap keledi.
