Lıvanǵa jiberiletin qazaqstandyq bitimgerler qajetti qarý-jabdyqpen qamtamasyz etilgen

ASTANA. QazAqparat - QR Parlamenti Senatynyń jalpy otyrysynda «QR Úkimeti men Úndistan Úkimeti arasyndaǵy BUU-nyń Lıvandaǵy Ýaqytsha kúshterindegi úndistandyq batalon quramynda qazaqstandyq bitimgershilik kontıngentti birlesip óristetý tártibi týraly ózara túsinistik týraly memorandýmdy ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Memorandýmǵa 2018 jylǵy 21 tamyzda BUU-nyń mıssııalaryna qatysýǵa QR Qarýly kúshteriniń áskerı qyzmetshilerin jiberý týraly QR Parlamentiniń 2018 jylǵy 15 maýsymdaǵy qaýlysyn júzege asyrý maqsatynda qol qoıylǵan.

«Qujatta bitimgershilik kontıgentti birlesip óristetý, atap aıtqanda, qolbasshylyq etý jáne basqarý, qarjylyq jáne medıtsınalyq qamtamasyz etý, sondaı-aq jeke quramdy daıarlaý tártibi aıqyndalǵan. QR Qarýly kúshteri Lıvanda 1978 jyldan bastap óristetilgen úndistandyq bitimgershilik kontıgentiniń qaramaǵyna 120 áskerı qyzmetshiden turatyn rotany usynady», - dedi QR Qorǵanys mınıstriniń orynbasary Talǵat Muhtarov.

Rota qajetti qarýmen jáne oq-dárimen, jeke jáne arnaýly jabdyqpen qamtamasyz etilgen. Ózara is-qımyl tártibi BUU-nyń rásimine sáıkes rettelgen. Sonymen qatar ol atalǵan aýmaqqa baǵyttalatyn áskerı qyzmetshiler qajetti vaktsınatsııadan ótkenin jetkizdi.

«Áskerılerimizdiń BUU mıssııasyna qatysýy halyqaralyq qaýipsizdikti nyǵaıtýǵa aıtarlyqtaı úles qosady. Sondaı-aq halyqaralyq qaýymdastyqtyń jaýapty múshesi retinde, onyń ishinde Qazaqstan Respýblıkasynyń BUU Qaýipsizdik Keńesindegi turaqty emes músheliginiń qorytyndysyn shyǵarý aıasynda da Qazaqstannyń bedelin nyǵaıtady», - dep túıdi Talǵat Muhtarov.

Budan buryn habarlanǵandaı, maýsym aıyndaǵy QR Parlamenti palatalarynyń birlesken otyrysynda Qazaqstannyń 120-ǵa jýyq áskerı qyzmetshisi Lıvandaǵy mıssııaǵa qatysatyny málim boldy.

Sonymen qatar Qazaqstan áskerıleri Lıvandaǵy bitimgerlik mıssııasyna ázirlenip jatqandyǵy aıtylǵan edi.

BUU mıssııasynda Qazaqstan bitimgerlerine tólenetin eńbekaqy mólsheri de belgili boldy.