Lıvanǵa bitimgerlik mıssııa: Qazaqstandyq áskerıler alǵashqy kómek kórsetýge úırendi
QR Qorǵanys mınıstrliginiń baspasóz qyzmetinen málim etkendeı, daıyndyq Áskerı medıtsına ortalyǵynda ótti. Ekinshi bitimgerlik rotanyń áskerı qyzmetshileri jattyǵýlardy Halyqaralyq Qyzyl krest komıteti jáne Qazaqstannyń Qyzyl jarty aı qoǵamy mamandarynyń qadaǵalaýymen jasady. Alǵashqy teorııalyq lektsııalar jaraqattar túrlerine, olardyń aýyrlyq deńgeıin anyqtaýǵa, dáriger kelgenge deıingi alǵashqy járdem kómekterine arnaldy.
Al praktıkalyq jattyǵýlardy oryndaý úshin jer silkinisi, blokpostaǵy órt, terakt sekildi birqatar jaǵdaılardyń ımıtatsııasy jasaldy.
«Oqý-jattyǵýlar búkil álemde qoldanylatyn halyqaralyq standarttar aıasynda júrgizildi. Bul rette, bitimgerlerdiń is-áreketteri alǵashqy jádel kómekti kórsetý sapasymen ǵana emes, olardyń halyqaralyq standarttarǵa saı bolýymen de baǵalandy. Jıyn sońynda qatysýshylarǵa sertıfıkattar berildi», - delingen mınıstrlik aqparatynda.
Qazaqstannyń Qyzyl jarty aı qoǵamynyń ókili Lázzat Ibragımovanyń aıtýynsha, qazaqstandyq bitimger polktyń áskerı qyzmetshileri baǵdarlama kýrsyn tııanaqty meńgerip, olardy is júzinde qoldanýdyń joǵary deńgeıin kórsetti.
