Lıvandyq fermerler áskerden marıhýana egistigin tartyp aldy
ASTANA. 24 shilde. QazAqparat - Pýlemet, granatamet jáne mınometpen qarýlanǵan lıvandyq eginshiler Bekaa alqabynda ósetin marıhýana egistigin qurtpaq bolǵan qarýly kúshke toıtarys berdi, dep habarlaıdy Reuters.
Atys saldarynan eshkim qaza bolǵan joq. Degenmen sharýalar áskerılerdiń eki djıp kóligin isten shyǵarǵan. Áskerıler qaıta jasaqtalý úshin keıin sheginýge májbúr bolǵan.
Bekaa alqaby 1975-1990 jyldardaǵy azamattyq soǵysta kannabınoıdtar men opıattar óndiretin úlken «ortalyqqa» aınaldy. Qolaıly aýa raıy saqtalǵan keıbir jyldary bul jerde myńdaǵan tonna marıhýana men 50 tonnadan astam opıým óndiriletin.
1991-1993 jyldary marıhýana men mak alqaptary BUU-nyń esirtki óndirýge qarsy baǵdarlamasy aıasynda túgeldeı joıylǵan edi. Alaıda olar jýyrda qaıta paıda boldy. Lıvandyq áskerıler men polıtsııanyń osy ósimdikti ósirýge qumartatyn «sharýalardy» alqaptan qýyp shyǵýǵa shamalary kelmeı otyr.
