Lıvandaǵy qazaqstandyq bitimgerlerdiń densaýlyǵy baqylaýda - Qorǵanys mınıstrligi

NUR-SULTAN. QazAqparat - 3-shi Qazaqstandyq bitimgershilik rotasy úndistandyq batalon quramyndaǵy BUU-nyń Lıvandaǵy bitimgershilik mıssııasyn jalǵastyrýda.

Pandemııaǵa baılanysty mıssııa qolbasshylyǵy vırýstyń taralýynyń aldyn alý úshin barlyq saqtyq sharalaryn qabyldady, dep habarlaıdy QazAqparat QR Qorǵanys mınstrliginiń baspasóz qyzmetine silteme jasap.

Qazir Lıvandaǵy jaǵdaı turaqty jáne jergilikti bılik pen «Lıvandaǵy BUU ýaqytsha kúshteri» qolbasshylyǵynyń baqylaýynda. 26 sáýirge deıin elimizde tótenshe jaǵdaı jarııalandy. Dıplomatııalyq tulǵalardy qospaǵanda, búkil halyq úshin Beırýt áýejaıy, qurlyq jáne teńiz ótkelderi jabyldy.

3-shi Qazaqstandyq bitimgershilik rotasynyń komandıri maıor Jánibek Nurlanovtyń aıtýynsha, bitimgershilik bazasyndaǵy jaǵdaı turaqty.

Mıssııadaǵy 11 myń áskerı qyzmetshi men azamattyq bitimgerlerdiń densaýlyq qaýipsizdigin qamtamasyz etý úshin karantın engizildi.

Bitimgerlik bazanyń árbir baqylaý-ótkizý pýnktinde medıtsınalyq personal kezekshilik etedi. Baılanyssyz termometrııa júzege asyrylyp, sanıtarlyq-gıgıenalyq normalar qatań saqtalǵan.

Bitimgerlerge vırýsty juqtyrý faktileri tirkelgen aýdandarǵa sapar jasamaý jáne jergilikti halyqpen baılanysty barynsha shekteý usynyldy. Jeke qurammen koronavırýstyq ınfektsııany juqtyrýdyń aldyn alý jáne boldyrmaý boıynsha sabaqtar únemi ótkiziledi.

«Bizdiń aldymyzda turǵan eń mańyzdy mindet – bitimshilerimizdi vırýstan qorǵaý. Sonymen qatar, onyń taralýynyń aldyn alý basty maqsattardyń biri, qazirgi ýaqytta bizdiń jumysymyz osyǵan baǵyttalǵan»,– dep atap ótti qazaqstandyq kontıngenttiń komandıri.

Komandırdiń aıtýynsha, qazaqstandyq bitimgerlerdiń moraldyq-psıhologııalyq jaǵdaıy da densaýlyqtary da jaqsy. Olar barlyq qaýipsizdik sharalaryn qatań ustana otyra, «kógildir syzyq» boıynda turaqtylyqty qamtamasyz etý úshin 24/7 rejıminde jedel qyzmetti júzege asyrý syndy óz mindetterin oryndaýdy jalǵastyrýda.

Qazaqstandyq bitimgershilik kontıngenti modýldik úlgidegi eki bitimgershilik bazada ornalasqanyn atap ótken jón. Kúndelikti jaıly jaǵdaıy qalyptasqan. BUU tarapynan qamtamasyz etiletin úsh mezgildik tamaqtaný uıymdastyrylǵan. Dene shynyqtyrýmen aınalysý úshin jabdyqtalǵan sport zaly bar. Mindetterdi oryndaýdan bos ýaqyt kezinde bitimgerler fýtbol, voleıbol, shahmat jáne bılıard oınaıdy. Árkim óz otbasymen beınebaılanys arqyly habarlasa alady.

Mıssııa basshylyǵy qazaqstandyq bitimgerlerdiń jaqsy daıyndyǵy men tártibin atap ótti. Ásirese, olar kólik júrgizýinde erekshelenedi.