Lıvandaǵy jaǵdaı: Frantsııa BUU Qaýipsizdik keńesinen shuǵyl jınalys ótkizýdi surady

ASTANA.KAZINFORM – Frantsııa Izraıl «Hezbollaǵa» qarsy operatsııasynyń bastalǵanyn jarııalaǵannan keıin Lıvandaǵy jaǵdaıdy talqylaý úshin BUU Qaýipsizdik Keńesiniń shuǵyl otyrysyn shaqyrýdy suraıdy.

- Men osy aptada Lıvanǵa qatysty Qaýipsizdik keńesiniń shuǵyl otyrysyn ótkizýdi suradym, - dedi Frantsııanyń syrtqy ister mınıstri Jan-Noel Barro BUU Bas Assambleıasynyń otyrysynda.

Al Birikken Arab Ámirlikteriniń (BAÁ) Syrtqy ister mınıstrligi «Izraıldiń Lıvannyń ońtústigine jasaǵan shabýyldaryna qatty alańdaýshylyq bildirdi».

Syrtqy ister mınıstrligi taratqan málimdemede Abý-Dabı «memlekettik qatynastar men egemendikti retteıtin zańdardy elemeıtin zorlyq-zombylyq, shıelenis, oılastyrylmaǵan áreketter men reaktsııalardy qabyldamaıdy» dep atap kórsetilgen.

Saýd Arabııasynyń Syrtqy ister mınıstrligi Lıvandaǵy oqıǵalardy «úlken alańdaýshylyqpen» baqylap otyrǵanyn aıtyp, barlyq taraptardy barynsha sabyrly bolýǵa shaqyrdy.

Er-Rııad, sondaı-aq, halyqaralyq qaýymdastyq pen múddeli taraptardy «óz rólderin oınaýǵa jáne aımaqtaǵy barlyq qaqtyǵystardy toqtatýǵa jaýapty kózqaras kórsetýge» shaqyryp, «Lıvannyń egemendigin qurmetteýdiń mańyzdylyǵyn» atap ótti.

Izraıl dúısenbi kúni Lıvandaǵy «Hezbolla» qozǵalysynyń nysandaryna jappaı soqqy bere bastady.

Lıvan densaýlyq saqtaý mınıstrliginiń málimetinshe, Izraıldiń eldegi áýe shabýylynan qaza tapqandar sany kem degende 492-ge jetip, 1640-tan astamy jaralanǵan. Qaza tapqandar arasynda 35 bala men 58 áıel bar.