Lıvandaǵy eń úlken jasandy kól úsh jyldyq qýańshylyqtan keıin qalpyna kelip jatyr

ASTANA. KAZINFORM — Lıvannyń eń úlken jasandy sý qoımasy — Karaýn kóli qysta jaýǵan mol jaýyn-shashynnyń arqasynda aıtarlyqtaı tola bastady. Bul sońǵy úsh jylǵa sozylǵan qatań qurǵaqshylyqtan keıingi alǵashqy oń ózgeris. Bul týraly Xinhua agenttigi jazdy.

Jergilikti bılik organdarynyń málimetinshe, 26 qańtardaǵy jaǵdaı boıynsha kóldegi sý deńgeıi teńiz deńgeıinen 840,12 metrge jetip, sý qory shamamen 65 mıllıon tekshe metrge deıin artqan.

Lıvandaǵy eń uzyn Lıtanı ózeni kólge quıatyn sý kólemin kúrt kóbeıtti. Jaqynda táýligine 5 mıllıon tekshe metrden astam sý kelip túsken, mundaı kórsetkish sońǵy birneshe maýsym boıy tirkelmegen.

Sý deńgeıiniń kóterilýi qurǵaqshylyqtan qatty zardap shekken aýyl sharýashylyǵy aımaǵyna úmit syılap otyr. Fermer Hassan Kamýnıdiń aıtýynsha, óńdeletin egis alqaptarynyń kólemi 70%-dan astamǵa qysqarǵan. Endi ylǵaldy kóp qajet etetin daqyldardy — bıdaı, kókónis pen kartopty qaıta ósirýge múmkindik týyp otyr.

Karaýn kóli energetıka salasy úshin de asa mańyzdy. Lebanon Electricity kompanııasyndaǵy derekkózdiń habarlaýynsha, sý deńgeıiniń kóterilýi elektr energııasyn óndirý kólemin arttyrýǵa múmkindik beredi. Qurǵaqshylyq kezeńinde elektr qýatyn óndirý kúrt tómendep, bul el boıynsha elektr tapshylyǵyn odan ári ýshyqtyrǵan.

Balyqshylar men týrızm salasynyń ókilderi jaǵdaıǵa úmitpen qarap otyr. Alaıda bılik ókilderi qalpyna kelý úderisi áli de osal ekenin, sebebi sýdyń lastaný máselesi saqtalyp otyrǵanyn eskertedi.

1959 jyly Lıtanı ózeninde salynǵan Karaýn kóli shamamen 12 sharshy shaqyrym aýmaqty alyp jatyr jáne eń joǵary syıymdylyǵy 220 mıllıon tekshe metrge jýyq. Ol Lıvannyń gıdroenergııa óndirý júıesinde sheshýshi ról atqarady, myńdaǵan gektar aýyl sharýashylyǵy jerin sýarady jáne mańyzdy týrıstik nysan sanalady.

Eske sala ketsek, Soltústik Aral jobasynyń ekinshi kezeńine de qarjy syrttan tartylady.