Lıvanda parlamenttik saılaý Izraılmen qaqtyǵysqa baılanysty eki jylǵa shegerildi

ASTANA. KAZINFORM — Lıvanda parlamenttik saılaýdy keıinge shegerý týraly sheshim Izraıl men «Hezbolla» qozǵalysy arasyndaǵy soǵys jaǵdaıynda qabyldandy, dep habarlaıdy Kazinform agenttiginiń Taıaý Shyǵystaǵy menshikti tilshisi.

Dúısenbi kúni ótken parlament otyrysynda Lıvan parlamenti óz ókilettikterin taǵy eki jylǵa uzartýdy bekitip, bastapqyda mamyr aıynda ótýi tıis parlamenttik saılaýdy keıinge shegerdi. Bul týraly parlament spıkeri Nabıh Berrı málimdedi.

Parlament otyrysy áskerı shıelenistiń saqtalyp turǵan jaǵdaıynda ótkizilgeni belgili. BAQ habarlaǵandaı, otyrys kezinde Beırýttiń ońtústik mańyndaǵy, «Hezbolla» qozǵalysyna jaqyn aýdandar ústinen Izraıl áskerı ushaqtary ushyp ótti.

Otyrysta «Hezbolla» parlamenttik blogynyń depýtattary da qatysty, onyń ishinde qozǵalystyń jetekshisi Mohammed Raad bar.

Lıvan sońǵy aıdaǵy aımaqtyq soǵysqa tartyldy, sebebi ótken aptada «Hezbolla» Izraılge shabýyl jasap, ony AQSh pen Izraıldiń soqqylary saldarynan Irannyń joǵary jetekshisi Alı Hameneıdiń qazasyna jaýap dep atady.

Lıvanda parlamenttik saılaý buǵan deıin de keıinge shegerilgen. 2013–2014 jyldary saılaý Sırııadaǵy soǵysqa baılanysty saıası daǵdarys saldarynan keıinge shegerilgen, al 2017 jyly jańa saılaý zańy tóńiregindegi daý sebep boldy.

2022 jylǵy sońǵy parlamenttik saılaýda «Hezbolla» men onyń odaqtastary parlamenttik kópshilikti joǵaltyp, dástúrli opponentteri men 2019 jylǵy narazylyq qozǵalysyna qatysy bar táýelsiz kandıdattarǵa jol berdi.

Qazirgi ýaqytta Lıvan parlamenti eki saıası lager arasynda tereń bólingen kúıde qalyp otyr. Saılaýdy keıinge shegerý sheshimi el úkimetinde «Hezbollanyń» qarýdan aırylýy múmkindigi týraly talqylaýlar barysynda qabyldandy. Bul qozǵalys óz saıası yqpalyn saqtaý úshin qarsylyq bildirip otyr.

Buǵan deıin Izraıl armııasy túnde shııttik «Hezbolla» qozǵalysyna tıesili nysandarǵa birqatar áýe soqqysyn jasaǵanyn málimdedi.