Lıvanda oryn alǵan qarýly qaqtyǵystarda zardap shekken Qazaqstan azamattary joq
ASTANA. 21 mamyr. QazAqparat - Lıvanda oryn alǵan qarýly qaqtyǵystarda zardap shekken Qazaqstan azamattary joq. Bul týraly búgin QR Syrtqy ister mınıstrliginiń resmı ókili Altaı Ábıbýllaev málimdedi.
«Lıvannyń Trıpolı qalasynda ótken aptanyń sońy - osy aptanyń basy aralyǵynda oryn alǵan qarýly qaqtyǵystarǵa Qazaqstan azamattarynyń qatysýy nemese onyń nátıjesinde zardap shegýi týraly jergilikti quzyrly organdardan maǵlumat kelip túspedi»,- dedi resmı ókil.
Aıta keteıik, teketires Sırııanyń resmı basshylyǵyn qoldaýshylar men qarsylastary arasynda týyndap otyr. Qos tarap ta Lıvan azamattary jáne Trıpolı turǵyndary, biraq bireýleri alaýıler bolsa, ekinshileri sýnnıt baǵytyn ustanýshy musylmandar. Qaqtyǵys nátıjesinde 10 adam qaza tapty, onyń bireýi áskerı qyzmetker. Jalpy, ártúrli jaraqat alǵandar sany 100-den asyp tústi.
