Lıvanda Izraıl soqqysynan úsh jýrnalıst qaza tapty
ASTANA. KAZINFORM - Izraıl qorǵanys armııasy olardyń BAQ ókilderi retinde jasyrynǵanyn málimdedi, dep jazady BILD.
Búgin Izraıl Lıvannyń ońtústigine soqqy jasap, úsh jýrnalıst qaza tapty. Málimetterge sáıkes, soqqy Djezzın aýdanynda jýrnalıster mingen avtokólikke baǵyttalǵan.
Izraıl qorǵanys armııasy bul shabýyl kezinde Izraılǵa qarsy kúres júrgizip otyrǵan Iranǵa jaqyn «Hezbolla» tobynyń elıtalyq bólimshesiniń ókili joıylǵanyn málimdedi.
Áskerı derekkózderdiń habarlaýynsha, qaza bolǵan jýrnalısterdiń biri «Hezbollaǵa» tıesili Al-Manar telearnasynda jumys istegen. Sondaı-aq «Hezbollaǵa» jaqyn Al-Maıadın telearnasynyń jýrnalısi jáne onyń baýyry — operator da mert boldy. Eki arna da óz tilshileriniń qaza tapqanyn rastady.
Izraıl áskeri óz kezeginde joıylǵan «Hezbolla» múshesi jýrnalıst retinde jasyrynǵanyn málimdedi.
Áskerılerdiń aıtýynsha, ol Lıvannyń ońtústigindegi ızraıldik sarbazdardyń ornalasý orny týraly aqparattardy júıeli túrde jetkizip otyrǵan.
Lıvan prezıdenti Jozef Aýn X áleýmettik jelisinde bul oqıǵany «soǵys kezinde jýrnalıster halyqaralyq qorǵaýǵa ıe ekenin kózdeıtin barlyq normalar men kelisimderdi óreskel buzatyn aıqyn qylmys» dep atady.
Aıta keteıik, osyǵan deıin Izraıl Iran men Lıvanǵa soqqylardy jalǵastyratynyn málimdegen bolatyn.
