Lıvanda Izraıl shabýyldarynan qaza tapqandar sany 3 558 adamǵa jetti
ASTANA. KAZINFORM – Áskerı shıelenis bastalǵan 2 naýryzdan beri Izraıldiń Lıvan aýmaǵyna jasaǵan shabýyldary saldarynan qaza tapqandar sany 3 558 adamǵa jetti. Bul týraly Anadoly agenttigi habarlady.
Izraıl áskeri 17 sáýirde kúshine engen jáne 17 mamyrdan bastap taǵy 45 kúnge uzartylǵan bitimge qaramastan, Lıvan aýmaǵyna soqqy jasaýdy jalǵastyryp otyr.
Lıvan Densaýlyq saqtaý mınıstrligi 2 naýryzdan beri Izraıl shabýyldarynyń saldarynan qaza tapqandar men jaralanǵandar sany týraly jańartylǵan málimet jarııalady.
Mınıstrlik deregine sáıkes, sońǵy 24 saǵat ishinde qaza tapqandar sany taǵy 32 adamǵa kóbeıip, jalpy sany 3 558 adamǵa jetken. Sondaı-aq jaralanǵandar sany 10 870 adamdy qurady.
4 maýsymda Densaýlyq saqtaý mınıstrligi jasaǵan málimdemede 2 naýryzdan beri Izraıldiń Lıvanǵa jasaǵan shabýyldary saldarynan 3 526 adamnyń qaza tapqany habarlanǵan edi.
Aıta keteıik, buǵan deıin Izraıl men Lıvan AQSh-tyń deldaldyǵymen atysty toqtatý týraly kelisimge kelgenin jazdyq.
Alaıda osy kelisim jarııalanǵannan keıin kóp uzamaı Izraıl Lıvanǵa shabýylyn qaıta jalǵastyrdy.
