Lıvanda 9 sáýir aza tutý kúni dep jarııalandy

ASTANA. KAZINFORM — Izraıl Lıvannyń astanasy Beırýt pen eldiń basqa da qalalaryn bombalady, saldarynan 254 azamat mert boldy. Qaıǵyly jaǵdaıǵa baılanysty elde 9 sáýir ulttyq aza tutý kúni dep jarııalandy. Bul týraly respýblıkanyń premer-mınıstri Navaf Salamnyń ókiminde aıtylǵan, dep habarlaıdy TASS.

— Premer-mınıstr Navaf Salam 2026 jylǵy 9 sáýir, beısenbi kúnin Izraıl shabýyldarynyń qurbany bolǵan, júzdegen jazyqsyz ári qarýsyz beıbit turǵyndardy eske alý úshin ulttyq aza tutý kúni dep jarııalady, — delingen aqparatta.

Salam bul kúni memlekettik mekemelerdi, qoǵamdyq uıymdardy jáne mýnıtsıpalıtetterdi jabý týraly ókim berdi. Ulttyq tý barlyq jerde tómen túsiriledi. Bılik sondaı-aq radıo men teledıdardaǵy baǵdarlamalardy ózgertedi.

Premer-mınıstr Lıvan halqyna, ul-qyzdarynan aıyrylǵan barlyq otbasylarǵa qaıǵyra kóńil aıtyp, jaralanǵandardyń tezirek saýyǵyp ketýin tiledi. Ol «Izraıldiń qyryp-joıý áreketin toqtatý úshin» arab elderiniń kóshbasshylarymen jáne halyqaralyq seriktestermen baılanysyn jalǵastyryp jatqanyn málimdedi.

Eske sala keteıik, Izraıl armııasy bitim jasasý aıasynda Iranǵa shabýylyn toqtatqanyn málimdedi, alaıda Lıvanda «Hezbollaǵa» qarsy áskerı operatsııalar jalǵasyp jatyr.

AQSh pen Iran bitiminen keıin Lıvanda qaza tapqandar sany 250-den asqany týraly buǵan deıin de habarladyq.