Lıvanda 860 myńǵa jýyq turǵyn májbúrli qonys aýdarýdan keıin úılerine oraldy
ASTANA. KAZINFORM – Buǵan deıin qarýly qaqtyǵys saldarynan úılerin tastap ketýge májbúr bolǵan Lıvannyń shamamen 860 myń turǵyny týǵan jerlerine oraldy, dep habarlaıdy BUU jańalyqtar qyzmeti.
Alaıda turaqsyz jaǵdaı jáne negizgi qyzmetterdiń qoljetimsizdigi eldegi daǵdarystyń aıaqtalǵanyn bildirmeıdi.
Atysty toqtatý týraly kelisim jarııalanǵanyna qaramastan, ótken demalys kúnderi Izraıldiń Lıvannyń ońtústigine jasaǵan jańa áýe soqqylary halyqtyń qaıta qonys aýdarýyna sebep boldy. Júzdegen otbasy baspana izdep eldiń soltústigine ketýge májbúr boldy.
BUU Bosqyndar isi jónindegi basqarmasynyń málimetinshe, shamamen 360 myń adam ázirge úılerine orala almaı otyr. Olardyń keminde 22 myńy ýaqytsha ornalastyrý ortalyqtarynda turyp jatyr. Qalǵandary týystarynyń úıin panalaýǵa nemese adam kóp jınalǵan jaldamaly páterlerge ornalasýǵa májbúr.
Jaǵdaı turaqsyz kúıinde qalyp otyr
Qaqtyǵystyń sharyqtaý sheginde Lıvanda ishki qonys aýdarǵandar sany bir mıllıonnan asqan. Qazir qarýly qaqtyǵystyń qarqyny báseńdegenimen, jalǵasyp jatqan áýe soqqylary, qozǵalysqa qoıylǵan shekteý jáne jarylmaı qalǵan oq-dáriler, ásirese eldiń ońtústigi men Bekaa ańǵarynda, turǵyndarǵa áli de qaýip tóndirip otyr.
Kóptegen otbasy qıraǵan ǵımarattar, úıindiler, eldi mekenderge qaýipsiz jetý múmkindiginiń bolmaýy jáne ınfraqurylymǵa keltirilgen eleýli zalal saldarynan úılerine qaıta almaı otyr. Keıbir aýdandarda densaýlyq saqtaý, elektr energııasy jáne sýmen jabdyqtaý júıeleri úzilispen jumys isteıdi nemese tolyqtaı isten shyqqan.
Jańa oqý jylynyń jaqyndaýy da qosymsha qıyndyq týǵyzyp otyr. Kóptegen ýaqytsha ornalastyrý ortalyǵy memlekettik mektepterdiń ǵımarattarynda ornalasqan. Endi oqý protsesin qaıta bastaý úshin bul ǵımarattardy bosatý qajet. Zardap shekken aýdandardyń mýnıtsıpalıtetteri otbasylarǵa ýaqytsha baspana berýge shaqyryp otyr. Bul adamdardyń qaıta qonys aýdarýyna jol bermeı, óz qaýymdastyqtaryna jaqyn jerde qalýyna múmkindik beredi.
Sonymen qatar úılerine oralǵandar men áli de qonys aýdarǵandar sanatyndaǵy adamdardyń arasyndaǵy shekara barǵan saıyn bulyńǵyr bolyp keledi. Keıbir otbasylar jaǵdaıdy baǵalaý úshin týǵan eldimekenderine qysqa merzimge baryp, sodan keıin ǵana tolyq oralý týraly sheshim qabyldaıdy. Al basqalary ýaqytsha turatyn jeri men týǵan aýdany arasynda qatynap júr.
Lıvan úkimeti qaıtarý jáne erte qalpyna keltirý jónindegi ulttyq baǵdarlama ázirledi.
Baǵdarlama aıasynda jarylmaı qalǵan oq-dárilerdi zalalsyzdandyrý, úıindilerdi tazartý, ınfraqurylymdy jóndeý jáne turǵyn úılerdi qalpyna keltirý qarastyrylǵan.
Bılik zardap shekken turǵyndarǵa BUU Bosqyndar isi jónindegi basqarmasy jáne basqa da gýmanıtarlyq uıymdardyń qoldaýymen ýaqytsha baspana, qarjylaı jáne psıhologııalyq kómek kórsetip jatyr.
— Lıvan áli daǵdarystan keıingi kezeńge ótken joq. El halyqtyń qonys aýdarýyna baılanysty kúrdeli jaǵdaımen jáne adamdardyń qaýipsizdigine tónetin turaqty qatermen betpe-bet kelip otyr, — dedi BUU Bosqyndar isi jónindegi basqarmasynyń ókili Babar Baloh.
Qarjy tapshylyǵy
Gýmanıtarlyq uıymdar resýrstardyń ótkir tapshylyǵyna tap bolyp otyr. Bul olardyń qonys aýdarǵan adamdarǵa da, úılerine oralýǵa tyrysyp jatqan otbasylarǵa da kómek kórsetý múmkindigin shekteıdi.
Lıvanǵa kómek kórsetý operatsııalarynyń qarjylandyrylýy nebári 48 paıyz. Al BUU Bosqyndar isi jónindegi basqarmasynyń 2026 jyly eldegi jumysyna qajetti qarajattyń tek 24 paıyzy ǵana bólingen.
BUU agenttigi halyqaralyq qaýymdastyqtyń turaqty qoldaýynsyz qonys aýdarǵan jáne úılerine oralǵan otbasylardyń eleýli qıyndyqtarǵa tap bola beretinin eskertti. Uzaq merzimdi sheshimderge qol jetkizý úshin gýmanıtarlyq kómek kórsetý, úıindilerdi tazartý, qalpyna keltirý jumystaryn júrgizý jáne qaýipsizdik jaǵdaıyn jaqsartý qajet.
Buǵan deıin Lıvan prezıdenti Jozef Aýn eldiń ońtústigine jasalǵan Izraıldiń jańa ólimge ákelgen soqqylary eki memleket arasyndaǵy beıbit kelissózderge qatysty «aıqyn belgi» bolǵanyn málimdegen edi.
Aıta ketelik Lıvan men Izraıl arasyndaǵy kelissózder qyrkúıekke josparlandy.
