Lıvan soty Mýammar Kaddafıdiń ulyn kepilmen bosatýdy buıyrdy

ASTANA. KAZINFORM — Lıvııanyń burynǵy basshysy ulynyń isi Lıvanda taǵy da jurtshylyqtyń nazarynda boldy, dep habarlaıdy Kazinform menshikti tilshisi.

Beırýtte sýdıa juma kúni Lıvııanyń burynǵy kóshbasshysy Mýammar Kaddafıdiń uly Hannıbal Kaddafıdi 11 mln dollar kóleminde aqsha tóleý kepilimen bosatýdy buıyrdy jáne oǵan elden shyǵýǵa tyıym saldy. Bul týraly AFP sottaǵy derekkózge silteme jasap habarlaıdy. 

Lıvan bıligi 2015 jyly Kaddafıdi 1978 jyly Lıvııaǵa resmı sapary kezinde iz-tússiz joǵalyp ketken sheıitterdiń rýhanı kóshbasshysy Musa as-Sadrdyń taǵdyry týraly aqparatty jasyrdy degen aıyppen qamaýǵa alǵan. 

Advokat Loran Baıon sot sheshimin «múldem qabyldanbaıtyn» dep atap, oǵan shaǵymdanýǵa ýáde berdi. 

— Hannıbal Kaddafıge halyqaralyq sanktsııalar salynǵan jáne onyń mundaı somany tóleýge múmkindigi joq. Ol 11 mln dollardy qaıdan tabady dep oılaısyz, — dep atap ótti qorǵaýshy. 

Qazir «Hezbollamen» odaqtas bolǵan «Amal» sheıittik qozǵalysynyń negizin qalaýshy Musa as-Sadr 47 jyl buryn Lıvııaǵa sapary kezinde kómekshisi jáne tilshimen birge joǵalyp ketken. 
2011 jyly qazanda Mýammar Kaddafı bılikten ketip, qaıtys bolǵannan keıin Kaddafı otbasy músheleri Lıvııadan qashyp ketti. Ol kezde Lıvan men Lıvııa arasyndaǵy qarym-qatynas shıelenisken kúıinde edi.

Lıvandyq model Alın Skafqa úılengen Hannıbal Kaddafı Sırııaǵa qashyp, onda Bashar Asad úkimetiniń qorǵaýynda boldy. 2015 jyldyń jeltoqsanynda ony qarýly adamdar urlap, Lıvan bıligine tapsyrǵan. Olar joǵalǵan kezde Hannıbal Kaddafı nebári úsh jasta bolǵanyna qaramastan, oǵan «aqparatty jasyrdy» degen aıyp taǵylyp, Beırýt túrmesine jabyldy.
Tamyz aıynda Human Rights Watch Kaddafıdiń qamaýda «dálelsiz aıyptarmen» otyrǵanyn málimdep, ony dereý bosatýdy talap etken. Osy aıda onyń advokaty qorǵaýyndaǵy adamnyń qatty depressııaǵa ushyraǵanyn jáne jaqynda aýrýhanaǵa túskenin habarlady.

«Amal» qozǵalysyn As-Sadrdan keıin basqarǵan parlament spıkeri Nabıh Berrı buǵan deıin Lıvııa bıligin ımamnyń joǵalyp ketýine qatysty yntymaqtastyǵy joq dep aıyptady, Trıpolı bul aıypty joqqa shyǵardy.

Buǵan deıin BUU Qaýipsizdik Keńesi 2027 jylǵa deıin Lıvandaǵy UNIFIL mıssııasyn aıaqtaý týraly sheshim qabyldaǵanyn jazǵan bolatynbyz.