Lıvan prezıdenti jańa premer-mınıstrdi taǵaıyndady
ASTANA. KAZINFORM — Lıvannyń jýyrda ǵana saılanǵan prezıdenti Djozef Aýn Halyqaralyq sottyń basshysy Navaf Salamdy eldiń jańa premer-mınıstri etip taǵaıyndady, dep habarlaıdy Kazinform menshikti tilshisi.
Dúısenbide Lıvan depýtattarynyń kópshiligi Navaf Salamnyń kandıdatýrasyn usyndy. Oǵan Lıvan parlamentiniń 128 depýtatynyń 84-i daýys berse, premer-mınıstr mindetin atqarýshy Nadjıb Mıkatı nebári toǵyz daýysqa ıe boldy, 35 depýtat qalys qaldy.
Salamǵa batysshyl saıası kúshterdiń depýtattary, sondaı-aq táýelsiz zań shyǵarýshylar daýys berdi degen boljam bar. Salam Saýd Arabııasy men Batys elderiniń qoldaýyna ıe ekeni de belgili.
Salam hrıstıan jáne drýz fraktsııalarynyń, sondaı-aq belgili sýnnıt zań shyǵarýshylarynyń, sonyń ishinde «Hezbollanyń» odaqtastary men qarsylastarynyń qoldaýyna ıe boldy, olar bul toptyń memleketke nuqsan keltiretinin aıtyp, óziniń qýatty arsenalynan bas tartýdy uzaq ýaqyt boıy talap etip keledi.
Salamnyń Lıvan úkimetiniń jańa basshysy bolyp saılanýy eldegi dinı fraktsııalar arasyndaǵy teńdiktiń aıtarlyqtaı ózgergenin kórsetti.
Aıta keteıik, Lıvannyń saıası júıesi ártúrli dinı birlestikter arasyndaǵy bılikti bólýge negizdelgen. Osylaısha, negizgi memlekettik laýazymdar belgili bir dinı toptardyń ókilderine arnalǵan: el prezıdenti — maronıt-hrıstıan bolýy kerek, premer-mınıstr tek sýnnıt musylmany, al parlament spıkeri tek shııt musylmany bola alady.
Sońǵy jyldary Hezbolla Salamnyń premer-mınıstr bolýyna birneshe ret tosqaýyl bolǵan, ony «AQSh qoldaıtyn kandıdat» dep ataǵan.
Seısenbi kúni Nadjaf Salam premer-mınıstr bolyp taǵaıyndalǵannan keıin Lıvanǵa oraldy. Ol Beırýttaǵy prezıdent saraıynda Djozef Aýnmen jáne parlament spıkeri Nabıh Berrımen kezdesip, jańa mınıstrler kabınetin qurý protsesin resmı túrde bastaıdy dep josparlanýda.
Lıvan aqparat quraldarynyń habarlaýynsha, Salamnyń aldynda qıyn mıssııa tur, óıtkeni Izraıl men Hezbolla arasyndaǵy soǵysty aıaqtaý úshin Lıvan Izraılmen bitimge kelgen. Salam eldi ekonomıkalyq daǵdarystan shyǵarý úshin de kóp jumys isteýi kerek.
Osyǵan deıin Eýroodaq Lıvanǵa qosymsha kúshter ornalastyrýǵa kómektesý úshin 200 mln eýro bólýge daıyn ekeni habarlandy.