Lıvan premer-mınıstri: Izraıl áskeri el aýmaǵynan shyǵaryla bastady
ASTANA. KAZINFORM — Lıvan bıligi AQSh-tyń araǵaıyndyǵymen qol jetkizilgen kelisim aıasynda Izraıl áskeriniń eldiń ońtústiginen shyǵaryla bastaǵanyn málimdedi, dep habarlaıdy Kazinform agenttiginiń menshikti tilshisi.
Lıvan premer-mınıstri Naýaf Salam sársenbi kúni Izraıl áskeri shyǵarylǵannan keıin bir kún buryn Lıvan armııasynyń bólimsheleri kirgen eldiń ońtústigindegi Zaýtar ál-Ǵarbııa eldi mekenine bardy.
Sapar barysynda úkimet basshysy Lıvannyń memlekettik týyn tigip, bul qadamdy Izraıl áskeriniń shyǵarylýynyń bastalýyn bildiretin sımvol dep atady.
— Búgin kýá bolyp otyrǵanymyz — tek bastamasy ǵana. Biz Izraıl áskeriniń Lıvannyń búkil aýmaǵynan tolyq shyǵarylýyn qamtamasyz etý úshin barlyq saıası jáne dıplomatııalyq kúsh-jigerimizdi jalǵastyramyz, — dedi Naýaf Salam.
مع بدء الانسحاب الاسرائيلي كلمتي من زوطر الغربية صباح اليوم:
— Nawaf Salam نواف سلام (@nawafsalam) July 22, 2026
أودّ أن أوجّه كلمة إلى اللبنانيين جميعًا، ولا سيّما إلى أهلنا في الجنوب، من بلدة زوطر الغربية. إن هذه لحظة وطنية تحمل أبعادًا سياسية ومعنوية كبيرة، لأنها تمثّل بداية الانسحاب الإسرائيلي من أرضنا.
لقد أكدنا منذ البداية… pic.twitter.com/c6OgiDHZ8R
Lıvan premer-mınıstri sondaı-aq ońtústik óńir turǵyndaryn úkimet olardyń úılerine qaýipsiz oralýy úshin qajetti sharalardyń barlyǵyn qabyldap jatqanyna sendirdi. Onyń aıtýynsha, memlekettik organdar joldardy tazalaý, negizgi ınfraqurylymdy qalpyna keltirý jáne azat etilgen aýmaqtardy mınalardan tazartý jumystaryn júrgizip jatyr.
Maýsym aıynyń sońynda Lıvan men Izraıl AQSh-tyń araǵaıyndyǵymen sheńberlik kelisimge qol qoıǵan bolatyn. Qujatqa sáıkes, Izraıl áskeri Lıvannyń ońtústigindegi birqatar eldi mekennen kezeń-kezeńimen shyǵarylady, al buryn «Hezbolla» qozǵalysy ornalasqan aýmaqtarǵa Lıvan armııasynyń bólimsheleri ornalastyrylady.
Kelisimdi iske asyrý birneshe eldi mekendi qamtıtyn pılottyq aımaqtan bastaldy. Zaýtar ál-Ǵarbııa Izraıl kúshteri ishinara shyǵarylǵannan keıin Lıvan armııasy kirgen alǵashqy qalalardyń biri boldy. Lıvan bıliginiń málimetinshe, áskerı qyzmetkerler turǵyndardyń oralýyna deıin aýmaqty mınalardan tazartý jáne qaýipsizdikti qamtamasyz etý jumystaryna kiristi.
Sonymen qatar kelisimdi júzege asyrý kezeń-kezeńimen jalǵasyp jatyr. Lıvan buqaralyq aqparat quraldarynyń habarlaýynsha, Izraıl áskeri eldiń ońtústigindegi keıbir aýdandarda áli de ornalasqan. Osyǵan baılanysty Lıvan armııasy qaýipsizdik sharalary tolyq aıaqtalǵanǵa deıin turǵyndardy keıbir eldi mekenderge oralmaýǵa shaqyrdy.
Buǵan deıin Lıvanǵa Qazaqstannyń bitimgerlik kontıngentiniń quramyndaǵy 11 áskerı qyzmetshi barǵany habarlanǵan bolatyn. Ótken aptada olar Lıvandaǵy BUU Ýaqytsha kúshteriniń (UNIFIL) bazasynda Qazaqstannyń memlekettik týyn kóterdi.
