Lıvan parlamenti ólim jazasyn joıýdy qoldady
ASTANA. KAZINFORM — Lıvan depýtattary qylmystyq jaza salasyna qatysty zańnamalyq ózgeristerdi maquldady. Quqyq qorǵaý uıymdary bul sheshimdi el úshin tarıhı qadam dep baǵalap otyr, dep habarlaıdy Kazinform agenttiginiń menshikti tilshisi.
Lıvan parlamenti seısenbi kúni ólim jazasyn joıyp, ony ómir boıyna bas bostandyǵynan aıyrý jazasymen almastyrýdy qoldady. Buǵan deıin shyǵarylǵan ólim jazasy týraly barlyq úkim de ómir boıyna bas bostandyǵynan aıyrý jazasyna aýystyrylady, dep habarlaıdy Lıvannyń NNA agenttigi.
Zań jobasyn 128 oryndyq parlament depýtattarynyń basym bóligi qoldady. Oǵan shııtterdiń «Hezbolla» qozǵalysynyń parlamenttik blogy qarsy shyqty. Qujat zańda belgilengen budan keıingi rásimderden, sonyń ishinde Lıvan prezıdenti Djozef Aýnnyń qol qoıýynan ótýi tıis.
Lebanon takes historic step, votes to abolish death penalty
— L'Orient Today (@lorienttoday) August 11, 2026
“By abolishing the death penalty, Lebanon has chosen to fight murder rather than resort to killing,” the justice minister says.https://t.co/vlz5Oaprg5
Eger zań túpkilikti kúshine ense, Lıvan Taıaý Shyǵysta ólim jazasyn resmı túrde joıǵan alǵashqy el bolady.
Іs júzinde elde ólim jazasy 20 jyldan astam ýaqyt boıy oryndalǵan joq. Sońǵy ólim jazasy 2004 jylǵy qańtarda júzege asyryldy. Alaıda sottar budan keıin de kisi óltirý, memleketke opasyzdyq jasaý, tyńshylyq, terrorızm sıpatyndaǵy jekelegen qylmystar jáne memlekettik qaýipsizdikke qarsy qylmystar úshin eń joǵary jaza taǵaıyndaýdy jalǵastyrdy.
Lıvannyń ádilet mınıstri Adel Nassar parlament sheshimin «tarıhı qadam» dep atady. Eýropalyq odaq ta ólim jazasynyń joıylýyn quptap, Lıvannyń óńirdegi basqa memleketterge mańyzdy úlgi kórsetip otyrǵanyn málimdedi.
— 20 jyldan astam ýaqyt boıy ólim jazasy oryndalmaǵannan keıingi búgingi qadam ony ýaqytsha toqtatýdan ómir súrý quqyǵyn turaqty quqyqtyq qorǵaýǵa kóshiredi, — dedi Amnesty International uıymynyń Taıaý Shyǵys pen Soltústik Afrıka boıynsha óńirlik dırektory Heba Moraıef.
Bul sheshim parlamentte sottalǵandardyń bir bóligine qatysty jazany qysqartýdy nemese olardy bosatýdy qarastyratyn keń aýqymdy raqymshylyq týraly jeke zań jobasy talqylanyp jatqan kezde qabyldandy.
BAQ málimetinshe, bul bastama, atap aıtqanda, ekstremıstik toptardyń shabýylynan qaza tapqan lıvandyq áskerı qyzmetshilerdiń týystary arasynda pikirtalas týǵyzdy.
Buǵan deıin seısenbi kúni Sırııa soty eldiń burynǵy prezıdenti Bashar Asadty syrttaı ólim jazasyna keskeni habarlanǵan bolatyn.
