Lıvan men Izraıl Vashıngtonda ekinshi kelissóz raýndyn ótkizedi
ASTANA. KAZINFORM — Lıvan men Izraıl arasyndaǵy kelissózderdiń ekinshi kezeńi Vashıngton qalasynda 23 sáýir, beısenbi kúni ótedi. Bul týraly joǵary laýazymdy lıvandyq sheneýnik habarlady, dep jazady Anadolu.
Derekkózdiń aıtýynsha, «Izraılmen ekinshi kezdesý beısenbi kúni Vashıngtonda ótedi», al onyń naqty egjeı-tegjeıleri keıinirek resmı túrde jarııalanady.
Aıta keteıik, buǵan deıin 15 sáýir kúni AQSh Memlekettik departamenti ǵımaratynda eki eldiń ókilderi kezdesken edi. Bul kezdesý birneshe apta buryn múmkin emes sııaqty kóringen. Izraıl men Lıvan elshileri shamamen eki saǵat boıy bir ústel basynda otyryp, kelissóz júrgizdi. Kezdesýge AQSh memlekettik hatshysy Marko Rýbıo da qatysqan. Eki el dıplomattary sońǵy ret 1993 jyly tikeleı kezdesken bolatyn.
Sondaı-aq, 16 sáýir kúni AQSh prezıdenti Donald Tramp Izraıl men Lıvan arasynda 10 kúndik bitim jarııalanǵanyn málimdegen edi.
Bul ýaqytsha bitim týraly habardan keıin álem elderiniń basshylary men úkimet ókilderi kelisimdi quptap, ony tolyq júzege asyrýǵa shaqyrdy.
