Lıvan men Izraıl Rımde tikeleı kelissózderdiń jetinshi kezeńin bastady
ASTANA. KAZINFORM — Lıvan men Izraıl AQSh-tyń araaǵaıyndyǵymen Rımde tikeleı kelissózderdiń jetinshi raýndyn bastady. Taraptar buǵan deıin qol jetkizilgen kelisimderdi júzege asyrý máselelerin talqylap jatyr, dep jazdy Kazinform tilshisi.
Kezdesý Italııa astanasyndaǵy AQSh elshiliginde ótip jatyr jáne kelissózder beısenbige deıin jalǵasady dep kútilýde.
Lıvannyń NNA aqparat agenttiginiń málimetinshe, taraptar maýsym aıynda Beırýt pen Tel-Avıv arasynda AQSh-tyń aralasýymen jasalǵan negizdemelik kelisimdi iske asyrý barysyn talqylaýdy bastady.
Aldyńǵy, altynshy kelissóz raýndy 14 maýsymda Rımde ótken bolatyn. Oǵan deıin taraptar Vashıngtonda bes kezdesý ótkizgen. Nátıjesinde 26 maýsymda Izraıl áskerin Lıvan aýmaǵynan kezeń-kezeńimen shyǵarý jáne onyń ornyna Lıvan armııasy bólimderin ornalastyrý, sondaı-aq «Hezbolla» qozǵalysyn qosa alǵanda qarýly toptardy qarýsyzdandyrýdy kózdeıtin negizdemelik kelisimge qol qoıyldy.
Israel-Lebanon talks begin in Rome as Lebanese army highlights weapons seizures
— The Cradle (@TheCradleMedia) August 4, 2026
——
Motorcades have arrived in Rome ahead of the seventh round of direct talks between Israel and Lebanon.
The Israeli delegation includes Israeli army officials, according to The Times of Israel.… pic.twitter.com/vSBmBkeIGh
Kelisimniń alǵashqy kezeńinde onyń talaptary jekelegen synaq aımaqtarynda, ıaǵnı «pılottyq aýmaqtarda» júzege asyrylady.
Aldyńǵy kelissózderden keıin Izraıl áskeri Zavtar-el-Garbııa eldi mekeniniń mańynan shyǵarylyp, bul aýmaqqa Lıvan armııasynyń bólimderi kirgen.
Lıvan premer-mınıstri Naýaf Salam buǵan deıin Beırýt Izraıl kúshteriniń el aýmaǵynan tolyq ári kezeń-kezeńimen shyǵarylýyn talap etip otyrǵanyn málimdegen.
AQSh Memlekettik departamentiniń ókili qazirgi kelissózder barysynda taraptar pılottyq aımaqtar tetigin keńeıtý, sheshilmegen shekara máseleleri jáne beıbitshilik pen qaýipsizdik salasynda jan-jaqty kelisimge kelý múmkindigin talqylaıtynyn aıtty.
Kelissózderge qaramastan, Lıvannyń ońtústiginde jaǵdaı áli de shıelenisti kúıde qalyp otyr. Lıvan tarapynyń málimetinshe, Izraıl áskeri birqatar eldi mekenderde ǵımarattardy buzý jáne nysandardy jarý operatsııalaryn jalǵastyryp jatyr.
Buǵan deıin Lıvan premer-mınıstri Izraıl áskeriniń el aýmaǵynan shyǵaryla bastaǵanyn málimdegenin jazǵan edik. Sonymen qatar Izraıl Lıvandaǵy qaýipsizdik aımaǵynda áskerı qatysýyn saqtaıtyny týraly habarlandy.
Al BUU Bas hatshysy AQSh, Izraıl jáne Irandy qaqtyǵysty toqtatýǵa shaqyrdy.
