Lıvan men Izraıl arasyndaǵy kelissózder qyrkúıekke josparlandy
ASTANA. KAZINFORM — AQSh-tyń araǵaıyndyǵymen Lıvan men Izraıl arasyndaǵy kelissózderdiń kezekti raýndy qyrkúıek aıynyń basynda Rımde ótedi. Bul týraly AQSh Memlekettik departamentiniń ókili málimdedi, dep jazady BelTA.
— AQSh-tyń araǵaıyndyǵymen Lıvan men Izraıl arasyndaǵy kelissózder kelesi aıdyń basynda Rımde jalǵasady. Kelissózder oń baǵytta júrip jatyr, taraptardyń eshqaısysy kelisimdi júzege asyrý qarqynyn báseńdetip otyrǵan joq, — dedi amerıkalyq sheneýnik.
Onyń aıtýynsha, taraptar saıası shekteýler men ishki qysymǵa tap bolyp otyr. Vashıngton bul máselelerdi «júıeli túrde retteýge tyrysyp jatyr». AQSh Memlekettik departamentiniń ókili sondaı-aq shııtterdiń «Hezbolla» qozǵalysy kelissózder úderisin buzýǵa tyrysyp jatqanyn aıtty. Budan bólek, áskerı úılestirý toby alǵashqy tájirıbelik aımaqtardy qurý jumystaryn jalǵastyratynyn málimdedi.
Buǵan deıin Al Mayadeen telearnasy dıplomatııalyq derekkózge silteme jasap, kelissózderdiń kelesi raýndy kúzden erte ótpeıtinin habarlaǵan. Sondaı-aq qazirgi kezeńde eki el arasynda tikeleı baılanys ornatý qarastyrylmaǵan.
Al Jazeera telearnasynyń málimetinshe, 4-6 tamyz aralyǵynda Rımde ótken kelissózderdiń jetinshi raýndynyń qorytyndysy boıynsha AQSh pen Izraıl Lıvan usynǵan «pılottyq aımaqtardy» keńeıtý máselesin qazir talqylamaýǵa sheshim qabyldaǵan. Bul sheshim kelisilgen eki aımaqta ilgerileýshilikke qol jetkizilgenge deıin kúshinde bolady.
26 maýsymda Lıvan men Izraıl AQSh-tyń qamqorlyǵymen Vashıngtonda ótken 5 kelissóz raýndynan keıin negizdemelik kelisimge qol qoıdy. Qujatqa sáıkes, Lıvan qarýly kúshteri el aýmaǵynyń tolyq baqylaýyn kezeń-kezeńimen qalpyna keltirýi tıis.
Kelisimde Izraıl áskerleri shyǵarylatyn «pılottyq aımaqtardy» qurý qarastyrylǵan. Shilde aıynyń sońynda Lıvan armııasy eldiń ońtústigindegi alǵashqy «pılottyq aımaqqa» áskerı kúshterin ornalastyra bastady.
Eske salaıyq, buǵan deıin Izraıl Lıvandaǵy qaýipsizdik aımaǵynan áskerin shyǵarmaıtyny týraly jazǵan bolatynbyz.
