Lıvan men Izraıl arasyndaǵy bitim úsh aptaǵa uzartyldy – Tramp

ASTANA. KAZINFORM – Lıvan men Izraıl arasyndaǵy bitim taǵy úsh aptaǵa uzartyldy. Bul týraly AQSh prezıdenti Donald Tramp Truth Social áleýmettik jelisindegi paraqshasynda málimdedi.

Amerıka basshysynyń aıtýynsha, mundaı sheshim onyń Aq úıde Izraıl men Lıvannyń joǵary laýazymdy ókilderimen kezdesýi nátıjesinde qabyldanǵan.

– AQSh Lıvanǵa «Hezbolladan» qorǵanýǵa kómektesý úshin onymen birlese jumys isteıdi, – dep jazdy Donald Tramp óziniń Truth Social áleýmettik jelisinde.

Sondaı-aq ol jýyq arada Vashıngtonda Izraıl premer-mınıstri Bınıamın Netanıahýdy jáne Lıvan prezıdenti Djozef Aýndy qabyldaýdy josparlap otyrǵanyn jetkizdi.

Eske sala keteıik, 16 sáýirde Donald Tramp Izraıl men Lıvan 10 kúndik bitimge kelgenin jarııalaǵan edi. Oǵan deıin Aq úıde osy eki el arasyndaǵy sońǵy 34 jyldaǵy alǵashqy ekijaqty kelissózder ótken.

Buǵan deıin Izraıl Lıvannyń radıkaldy «Hezbolla» tobynyń pozıtsııalaryna soqqy jasaǵan. Atalǵan top Irandy qoldaý maqsatynda Izraıl aýmaǵyn atqylap kelgen.

Jarııalanǵan bitimge qaramastan, óńirdegi jaǵdaı áli de kúrdeli. Sársenbi kúni Lıvan Izraıldi áýe shabýylyn jasady dep aıyptap, sonyń saldarynan jýrnalıst Amal Halıl qaza taýyp, taǵy bir tilshi jaralanǵanyn habarlady.

Al Izraıl óz áreketin áskerı qyzmetkerleriniń qaýipsizdigin qamtamasyz etý qajettiligimen túsindirdi.

Aıta keterligi, Lıvandaǵy atysty toqtatý Irannyń AQSh-pen júrgizgen kelissózderindegi negizgi talaptarynyń biri bolǵan.

Eske sala ketsek, buǵan deıin AQSh pen Iran kelissózderi aıasyndaǵy bitim merzimi aıaqtalýǵa jaqyn, nátıje áli belgisiz ekenin jazdyq.