Lıvan qarańǵylyq qushaǵynda, elektr stansalary isten shyqty
NUR-SULTAN. QazAqparat – Lıvanda otyn jetispeýshiligi saldarynan eldegi eń iri eki elektr stansasy isten shyqty. Soǵan baılanysty búkil elde jaryq joq, dep habarlaıdy QazAqparat VVS-ge silteme jasap.
Lıvanda mundaı jaǵdaı únemi bolyp turady, jaryq ótken demalys kúnderi de bolmaǵan.
Électricité du Liban memlekettik kompanııasy osy máseleni sheshpekshi, biraq jaryq dúısenbige deıin bolmaıtynyn eskertken. Bılik otyndy áskerılerdiń qorynan paıdalanbaq, biraq ony qashan alatyny belgisiz.
Adamdar keshke qaraı jaryqtyń sónetinine ábden úırengen. Beırýttyń kóptegen aýdandarynda kún saıyn birneshe saǵat elektr bolmaıdy. Keıde, tipti 22 saǵatqa deıin sóndiriledi. Kóptegen lıvandyqtarda dızeldik generatorlar bar, biraq dızeldik otyn da tapshy.
