Lıvan Izraılmen shekarada ásker sanyn 10 myńǵa deıin kóbeıtpek

ASTANA. KAZINFORM – Izraıl ózi baqylap otyrǵan 5 aýdannan áskerin shyǵara sala Lıvannyń ońtústik shekarasyndaǵy ásker sany 10 myńǵa deıin ulǵaıtylady. Bul týraly respýblıka prezıdenti general Djozef Aýn málim etti, dep habarlaıdy reseılik TASS.

- Eldiń ońtústiginde Lıvan armııasy men BUU bitimgershilik kontıngentinen basqa eshqandaı da qarýly kúshter bolmaıdy, - dep málimdedi ol Ulybrıtanııa syrtqy ister mınıstri Devıd Lemmımen Baabda saraıynda kezdesýi barysynda.

- Bizdiń áskerimizdiń sany Lıtanı ózeninen ońtústikke qaraı 10 myńǵa deıin ulǵaıtylady, - dedi ol.

Prezıdenttiń baspasóz qyzmetiniń H áleýmettik jelisinde jazýynsha, Aýn Izraıldiń óńirde qaýipsizdik pen turaqtylyqty qalpyna keltirýge kedergi keltirip jatqanyn aıtqan.

- Zamanýı áskerı tehnologııalar barda bes tóbeni okkýpatsııalaý isi eshqandaı da strategııalyq mańyzǵa ıe emes. Sol sebepti biz Ulybrıtanııa men ózge de derjavalardy Izraılge qysym jasap, olardyń áskerin shyǵarýǵa, Lıvanǵa shabýyldy toqtatýǵa, BUU Qaýipsizdik Keńesiniń 1701 qararynyń talaptaryn oryndaýyna yqpal etýge shaqyryp otyrmyz, - dedi saıasatker.

Prezıdent Londonnyń 2025 jyldyń 31 tamyzynda bitetin BUU ýaqytsha kúshteri mandatynyń merzimin uzartýǵa qoldaý kórsetedi dep úmittenetinin atap ótti.

- Qazirgi jaǵdaı BUU Qaýipsizdik Keńesiniń 1701 qarary tolyq oryndalǵanǵa deıin bitimgerlik kúshterdiń bolýyn qajet etedi, - dedi ol.

Osyǵan deıin Izraıl armııasy Lıvannyń ońtústigin atqylaǵany týraly jazdyq.