Lıvan Izraıldiń Hezbollaǵa qarsy áýe shabýylynan 274 adam qaza tapqanyn habarlady

BEIRÝT. KAZINFORM – 23 qyrkúıekte Izraıldiń «Hezbolla» nysanalaryna jasaǵan aýqymdy soqqylarynan 300-ge jýyq adam, sonyń ishinde áıelder men balalar qaza tapty, dep habarlady Lıvan bıligi. Bir aptaǵa jetpeı 5 myńǵa jýyq adam jaralanǵan, dep jazady DW.

23 qyrkúıek, dúısenbi kúni Izraıldiń Lıvandaǵy "Hezbolla" qozǵalysynyń nysandaryna jappaı soqqy berýi nátıjesinde 274 adam qaza tapty, onyń ishinde 39 áıel men 21 bala, dep habarlady Lıvan densaýlyq saqtaý mınıstri Fıras Abıad Beırýttegi baspasóz máslıhatynda. Lıvannyń NNA memlekettik aqparat agenttiginiń habarlaýynsha, qaza tapqandar arasynda tótenshe jaǵdaılar qyzmetiniń qyzmetkerleri de bar. Taǵy 1000-ǵa jýyq adam jaraqat alǵan.

Abıad eldiń soǵys bolyp jatqan aımaqtarynan myńdaǵan otbasy qaýipsiz aımaqtarǵa qashýǵa májbúr bolǵanyn aıtty. Sonymen birge, «bir aptadan az ýaqyt ishinde» 5 myńǵa jýyq adam Izraıldiń atqylaýy nátıjesinde jaralandy, dep málimdedi Lıvan mınıstri. 

Bir ǵana peıdjerler men ratsııalardyń jappaı jarylýynan 3 myńǵa jýyq adam zardap shekken. Lıvan bıligi bul shabýylǵa Izraıldi aıyptap otyr.

Al, Lıvannyń «Hezbolla» lańkestik toby Izraılge zymyranmen shabýyldaryn jalǵastyrýda. Sonymen birge, ızraıldik BAQ-tyń habarlaýynsha, 2023 jyldyń 7 qazanynda soǵys qımyldary bastalǵannan beri alǵash ret alys qashyqtyqqa soqqylaıtyn zymyrandar qoldanylýda. Izraıl tarapynan qaza tapqandar men jaralanǵandar týraly aqparat joq. Izraıl premer-mınıstri Bınıamın Netanıahý men qorǵanys mınıstri Ioav Galant el turǵyndaryn sabyrly bolýǵa jáne tártipti saqtaýǵa shaqyrdy.

Aıta keteıik, buǵan deıin Izraıldiń «Hezbollaǵa» jasaǵan eń iri shabýylynan 180-nen astam adam qaza tapqanyn habarlaǵan edik.