Lıtvanyń Syrtqy ister mınıstri Qazaqstanǵa saparmen keldi

ASTANA. QazAqparat – Lıtva Respýblıkasynyń Syrtqy ister mınıstri Gabrıelıýs Landsbergıs Qazaqstanǵa resmı saparmen keldi, dep habarlaıdy QazAqparat tilshisi.

Lıtva Respýblıkasynyń Syrtqy ister mınıstri Gabrıelıýs Landsbergıstiń Qazaqstanǵa resmı sapary aıasynda QR Premer-Mınıstriniń orynbasary – Syrtqy ister mınıstri Muhta Tileýberdi BAQ aldynda lıtvalyq áriptesimen ótken kelissózdiń qorytyndysy týraly málimdeme jasady.

«Búgin Gabrıelıýs Landsbergıs myrzamen biz Qazaqstan men Lıtva arasyndaǵy saıası, saýda-ekonomıkalyq jáne mádenı-gýmanıtarlyq yntymaqtastyqtyń jaı-kúıi men perspektıvalaryn talqyladyq, halyqaralyq kún tártibindegi ózekti máseleler boıynsha pikir almastyq.

Lıtvalyq dostarymyzdyń Astanaǵa sapary Qazaqstan men Lıtva arasyndaǵy dıplomatııalyq qatynastardyń ornaǵanyna 30 jyl tolýyna oraılastyrylǵan.

Osy jyldar ishinde elder arasynda ekijaqty jáne kópjaqty formattaǵy syndarly qatynastar men ózara tıimdi yntymaqtastyqty nyǵaıtýǵa yqpal etetin barlyq deńgeılerde senimdi dıalog jolǵa qoıylyp, qoldaý kórsetilýde», - dedi Syrtqy ister mınıstri.

Vıtse-Premer Vılnıýstiń Astana úshin Baltyq aımaǵynda da, jalpy Eýropalyq odaqta da mańyzdy jáne senimdi seriktes ekenin atap ótti.

Lıtva 2016 jyly alǵashqylardyń biri bolyp Qazaqstan Respýblıkasy men Eýropalyq Odaq arasyndaǵy Keńeıtilgen áriptestik pen yntymaqtastyq týraly kelisimdi (KÁYK) ratıfıkatsııalady, oǵan respýblıkamyzdyń Eýropalyq Odaq elderimen 29 salada yntymaqtastyǵynyń quqyqtyq negizderi qalandy.

Atalǵan kelisim erejelerin iske asyrý ekijaqty formatta da, óńirlik jáne jahandyq deńgeıde de Qazaqstannyń jáne Eýroodaqqa múshe memleketterdiń saıası ózara is-qımyl kókjıegin keńeıtýge jáne ekonomıkalyq baılanystaryn tereńdetýge járdemdesedi.

Túrli halyqaralyq alańdarda ózara qoldaý kórsetý Qazaqstan-Lıtva yntymaqtastyǵynyń ózine tán stıline aınalýda», - dedi Muhtar Tileýberdi.