Lıtvalyq dáriger aryqtaǵysy kelgen qazaqstandyqtarǵa ota jasady
ShYMKENT. QazAqparat - Lıtvalyq dáriger aryqtaǵysy kelgen Ońtústik Qazaqstan oblysy turǵyndaryna ota jasady. Oblystyq klınıkalyq aýrýhanada 2 naýqasqa laporoskopııalyq ádispen asqazan kólemi kishireıtildi, dep habarlaıdy QazAqparat tilshisi.
Lıtvalyq hırýrg Almatnas Malıatskas artyq salmaqtan aryla almaı júrgenderdi osyndaı jańalyǵymen qýantty. Kaýnas ýnıversıtetiniń professorynyń pikirinshe, asqazan jaı ǵana bir torsyq emes, ol hımııalyq tehnologııalar men ınjenerlik esepteýlerden asa muqııat quralǵan óndiris týyndysy. Allanyń bergen erekshe nyǵmeti. Qorek alǵannan keıin mólsheri 500 ml-den 1500 ml-ge jetip, qaryndaǵy orny keńeıedi. Al kóp mólsherde tamaq jeý semizdik týdyrady. Osylaısha, bilikti maman 2001 jyldan beri asqazandy kishireıtý arqyly naýqastardyń ómir súrý sapasyn jaqsartýmen aınalysýda.
«Ota jasatý úshin naýqastardyń jas shamasy shektelgen. 16-dan tómen jáne 65-ten joǵary bolmaýy shart. Eger naýqastyń jas shamasy 65-ten joǵary bolsa, otadan keıingi asqynýlar bolýy múmkin»,- deıdi professor, hırýrg.
Aıta keteıik, barıatrııalyq ota tek úshinshi dárejeli semizdikke shaldyqqandarǵa ǵana jasalady. Operatsııadan keıin naýqas aı saıyn az mólsherde salmaq tastaı bastaıdy. Sebebi tamaqqa tábeti azaıyp, qomaǵaılyq protsesi tómendeıdi. Bir otyrǵanda tek eki as qasyq tamaq ishetin bolady. Semizdik saldarynan paıda bolǵan býyn aýrýlary da joıylady. Dáriger qant kórsetkishi de tómendeıtinin aıtady.
«Asqazandy tuıyqtaý kezinde ol tıtandy qysqyshtarmen tigilip, eki jaqqa bólinedi. Kishkentaı asqazanǵa jińishke ishek tigiledi. Solaı adam operatsııadan keıin óte az tamaq jeıdi. Tamaq kishkentaı asqazan jaqpen ótetindikten aǵzalyq zattar sińirilip úlgermeıdi. Bul operatsııa 80% artyq salmaqtan arylýǵa múmkindik beredi», - deıdi Almatnas Malıatskas.
Aıta keteıik, Lıtvalyq hırýrg eýropada barıatrııany, ıaǵnı semizdikti emdeýdi tuńǵysh zerttegen ǵalym. 17 jylda 2500 azamatty artyq salmaqtan aryltqan. Ol shymkenttik mamandardyń sheberligin shyńdaý úshin arnaıy kelgen bolatyn. Óńir dárigerleriniń tájirıbesi tolysyp, otany ózderi jasaı alatyn dárejege jetken soń, aımaqta semizdikten qınalǵandar qatary edáýir azaıady dep kútilýde.
