Lıtvadan kelgen baıqaýshy Qazaqstandaǵy saılaýdyń ınklıýzıvti ótýine joǵary baǵa berdi
ASTANA. KAZINFORM — Lıtva Respýblıkasynyń Qazaqstandaǵy Almaty qalasyndaǵy Bas konsýly Sarýne Kýbılıýte Quryltaı depýtattarynyń saılaýynda daýys berýdiń uıymdastyrylýyn oń baǵalady.
Ol áriptesterimen birge bes saılaý ýchaskesine baryp, ondaǵy tynysh ahýaldy, daýys berýdiń qoljetimdiligin jáne azamattardyń erkin tańdaý jasaýyna kedergi bolmaǵanyn atap ótti.
Dıplomattyń aıtýynsha, ózi barǵan saılaý ýchaskelerinde daýys berýshilerge barlyq qajetti jaǵdaı jasalǵan, al daýys berý protsesi uıymdasqan túrde ótip jatyr.
— Áriptesterimmen birge bes saılaý ýchaskesine bardyq. Jalpy, barlyǵy jaqsy dep aıtar edim. Maǵan ondaǵy ahýal unady. Adamdar kelip, óz tańdaýyn jasaýǵa barlyq múmkindigi bar, — dedi Sarýne Kýbılıýte.
Halyqaralyq baıqaýshy saılaý protsesiniń múgedektigi bar azamattar úshin qoljetimdi bolýyna erekshe nazar aýdardy. Onyń aıtýynsha, saılaý ýchaskelerinde kórý jáne estý qabileti buzylǵan azamattardyń daýys berýine qajetti jaǵdaı jasalǵan.
— Kózi kórmeıtin jáne qulaǵy estimeıtin adamdardyń da daýys berýine barlyq múmkindik jasalǵany meni tańǵaldyrdy. Bul óte mańyzdy, — dep atap ótti ol.
Inklıýzıvti tásil týraly suraqqa jaýap bergen Bas konsýl daýys berýge teń qoljetimdilik halyqaralyq saılaý standarttarynyń mańyzdy talaptarynyń biri ekenin aıtty.
— Inklıýzıvti qoljetimdilik árdaıym saılaýdyń joǵary standarttarynyń biri sanalady. Sebebi barlyq adamǵa birdeı jaǵdaı jasalýy kerek. Men sizderde munyń bári bar ekenin kórip otyrmyn, bul quptarlyq, — dedi Sarýne Kýbılıýte.
Ol saılaý ýchaskelerine barǵan kezde daýys berýshiler úshin qandaı da bir shekteý nemese kedergi baıqamaǵanyn da aıtty. Onyń sózinshe, azamattar saılaýǵa erkin kelip, óz tańdaýyn jasaı alǵan.
Dıplomat saılaýdy halyqaralyq deńgeıde baqylaý tájirıbesi bar ekenin atap ótti. Buǵan deıin ol Moldova, Grýzııa jáne Ázerbaıjandaǵy saılaýlarǵa halyqaralyq baıqaýshy retinde qatysqan.
— Men saılaýdy birinshi ret baqylap otyrǵan joqpyn, halyqaralyq tájirıbem bar. Ázirge kórgenderim kóńilimnen shyqty, — dedi ol.
Sarýne Kýbılıýte Qazaqstannyń demokratııalyq damýy el azamattary úshin ǵana emes, halyqaralyq yntymaqtastyq úshin de mańyzdy ekenin atap ótti.
Osyǵan deıin Halyqaralyq baıqaýshy, M. Boım atyndaǵy Azııa jáne jahandyq zertteýler ınstıtýty keńesiniń múshesi, Ortalyq Azııa boıynsha sarapshy Ejı Oledzkıı Qazaqstandaǵy Quryltaı depýtattarynyń saılaýyn uıymdastyrý deńgeıi men onyń ashyqtyǵyn atap ótti.
