Lıtvada turatyn qazaqstandyqtar elshilikke baryp daýys bere alady

NUR-SULTAN. QazAqparat - 9 maýsym - saılaý kúni Lıtvada saılaý ýchaskesi ashylady. Bul týraly QR Lıtvadaǵy Elshisi Vıktor Temirbaev lıtvalyq jetekshi BAQ-qa arnalǵan brıfıngte málimdedi, dep habarlaıdy QazAqparat elshilikke silteme jasap.

Qazaqstandyq dıplomat sheteldik jýrnalısterdi Qazaqstandaǵy saıası ózgerister boıynsha, sondaı-aq eldegi prezıdenttik saılaýǵa daıyndyq jóninde habardar etip, el Konstıtýtsııasynyń negizgi erejeleri men QR zańnamasy týraly, joǵary memlekettik laýazymǵa úmitkerlerdi tirkeý, baıqaýshylardyń jumysy, BAQ-ty akkredıtteý jáne saılaý aldyndaǵy úgit jumysyn júrgizý týraly sharttardy túsindirdi.

Vıktor Temirbaev el basshylyǵynyń halyqaralyq mindettemeler jáne kelisimderge degen mindettemesin, sondaı-aq óz múddelerimiz ben basymdyqtarymyzǵa sáıkes teńdestirilgen syrtqy jáne turaqty ekonomıkalyq saıasatty jalǵastyrý týraly naqty sheshimin rastady.

Elshi Qazaqstan Respýblıkasy Prezıdentiniń kezekten tys saılaýy kezinde Lıtva men Latvııa aýmaǵynda turaqty jáne ýaqytsha turatyn QR azamattary ózderiniń konstıtýtsııalyq (saılaý) quqyǵyn júzege asyrýǵa múmkindigi bar ekenin atap ketti.

Osyǵan oraı Qazaqstannyń Lıtvadaǵy Elshiliginde, Vılnıýs qalasy, Bırýtes kóshesi 20A mekenjaıy boıynsha № 242 saılaý ýchaskesi jumys isteıdi. Aldyn ala aqparatqa sáıkes, búgingi tańda Lıtvadaǵy saılaýshylardyń sany - 230 bolsa, al Latvııada 70 adam bar.

Bul rette Latvııadan kelgen qazaqstandyq stýdentterge jeke kólik uıymdastyrylady.