Lıtvada tártip saqshylary jalaqynyń tómendigine baılanysty jappaı jumystan ketýi múmkin

ASTANA. KAZINFORM – Lıtvanyń bas polıtsııa komıssary polıtsııa departamentiniń bıýdjeti dáli qazirgi jaǵdaıynda qabyldanatyn bolsa, júzdegen polıtsııa ofıtseri jumystan ketýi múmkin ekenin eskertti, dep habarlaıdy BELTA.

Arýnas Paýlaýskastyń aıtýynsha, polıtsııada 25 jyldan astam ýaqyt qyzmet etip júrgender qyzmetinde qalatyn bolsa, olarǵa qosymsha syıaqy tólenedi dep ýáde berilgen. Alaıda buǵan qosymsha qarjy bólingen joq.

-Menińshe, jańa jyldan soń qosymsha qarjylandyrý kólemi dáli qazirgi jobadaǵydaı bolatyn bolsa, qańtar, aqpan, naýryz aılary aralyǵynda polıtsııadan 300-400-deı qyzmetker ketýi múmkin. Sebebi olar qosymsha qarjylandyrý bolady degen úmitpen júr,-dedi ol Lıtva Seıminiń ulttyq qaýipsizdik pen qorǵanys komıtetinde keler jyldyń bıýdjeti talqylanyp jatqan kezde.

Paýlaskas qazirgi tańda Lıtva polıtsııasyna 1,5 myń qyzmetker jetpeı jatqandyǵyn aıtty.

Іshki ister organdarynyń ózge bólimsheleriniń ókilderi de jalaqynyń tómendigi men materıaldyq qamtamasyz etý máselesine rıza emes. Olar jalaqy eldegi ortasha deńgeıden tómen dep esepteıdi.

Órt qorǵanysy men qutqarý isi departamentiniń bastyǵy Renato Pojela órt sóndirýshilerdiń ortasha jalaqysy eldegi ortasha jalaqydan 100 eýroǵa tómen ekenin aıtty.

Ol órt sóndirýshilerdiń jalaqysyn eń quryǵanda 100 eýroǵa kóbeıtý úshin qosymsha 12 mln eýro kerek ekenin, al qazirgi tańda bul somanyń tek jartysyn ǵana bólý josparlanyp otyrǵanyn aıtty.

Departament basshysy jalaqynyń tómendiginen organ ókilderi qosymsha jumys isteýge májbúr ekenin, sondyqtan olar jumysqa sharshap keletinin aıtty.

-Taǵy bir problema ınfraqurylymmen baılanysty. Bizdiń ınfraqurylymnyń 80 paıyzy eskirgen, olardy jańartý kerek,-dep qosty ol.

Osyǵan deıin Lıtva premer-mınıstri jemqorlyqqa qatysty daýly oqıǵadan keıin otstavkaǵa ketkeni týraly jazdyq.