Lıtvada Qazaqstan tarıhy men mádenıetine qatysty derekter tabyldy
ASTANA. KAZINFORM - QR Ortalyq memlekettik kıno-fotoqujattar men dybys jazbalary arhıviniń qyzmetkerleri Lıtva Respýblıkasynda júrgizgen ǵylymı-zertteý jumystary barysynda elimizdiń tarıhy men mádenıetine qatysty derekter anyqtaldy.
QR Mádenıet jáne aqparat mınıstrligi baspasóz qyzmetiniń habarlaýynsha, anyqtalǵan qujattar qatarynda 1975 jyly Vılnıýs qalasynda ótken Qazaq kınosynyń kúnderine baılanysty, Sh.Aımanov atyndaǵy «Qazaqfılm» kınostýdııasy delegatsııasynyń Lıtvaǵa sapary, Qazaq KSR-niń halyq ártisi Nurmuhan Jantórın men Qazaq KSR-niń Abaı atyndaǵy Memlekettik syılyǵynyń laýreaty, rejısser Sultan Qojyqovtyń lıtvalyqtarmen kezdesýleri týraly derekti materıaldar bar.
Sondaı-aq burynǵy Kókshetaý oblysyndaǵy tyń ıgerý jumystaryna lıtvalyq mamandardyń qatysqany týraly da qundy málimetter tabyldy. Atap aıtqanda, olardyń mektep janyndaǵy lagerlerde, medıtsına pýnktterinde, qurylys salasynda eńbek etkeni jáne qazaq halqynyń salt-dástúrimen tanysqany jónindegi qundy derekter kezdesedi.
Zertteý jumystaryn QR Ortalyq memlekettik kıno-fotoqujattar men dybys jazbalary arhıvi dırektorynyń orynbasary, tarıh ǵylymdarynyń kandıdaty Sáýle Sataeva júrgizip, Vılnıýs, Kaýnas jáne Klaıpeda qalalaryndaǵy Ortalyq memlekettik arhıvterinde boldy.
Sapar barysynda aımaqtyq arhıv basshylarymen kezdesýler ótip, ekijaqty yntymaqtastyq máseleleri talqylandy.
- Nátıjesinde XIX ǵasyrdyń sońy men XX ǵasyrdyń basyndaǵy qazaq jáne lıtvalyq áıelderdiń beınesine arnalǵan fotokórme uıymdastyrý jóninde kelisim jasaldy, - delingen habarlamada.
Osyǵan deıin Almatyda Qytaı men Qazaqstannyń mádenıet jármeńkesi ótkeni týraly habarladyq.